Read Batak Toba PSALMEN 135 Bible Online

PSALMEN 135 - Batak Toba bible

PSALMEN 135

¹I. [1] Halleluya! Puji hamu ma goar ni Jahowa, mamujimuji ma hamu, ale naposo ni Jahowa! [1632†]

²Hamu angka na jongjong di bagasan joro ni Jahowa, di angka alaman ni bagas ni Debatanta!

³Puji hamu ma Jahowa, ai pardengganbasa do Jahowa, endehon hamu ma goarna, ai hasudungan do Ibana.

⁴Ai nunga pola dipillit Jahowa si Jakkob di Ibana, nang Israel asa Ibana nampunasa. [1633†]

⁵Ai anggo ahu tangkas do huboto, tung natimbul do Jahowa, jala Tuhanta i mangatasi sude angka Debata sileban. [1634†]

⁶Nasa lomo ni rohana dipatupa Jahowa do di angka langit dohot di tano on, di bagasan angka laut ro di sude angka lung. [1635†]

⁷Ibana do panaekkon angka ombun sian ujung ni tano on, gabe udan do angka hilapi dibahen, Ibana do paruarhon alogo sian angka parpeopanna. [1636†]

⁸Ibana do mambunu angka buhabaju ni Misir, sian jolma ro di pinahan. [1637†]

⁹Ibana manongos angka tanda dohot halongangan di parsitongaanmi, ale Misir, mangalo Firaun dohot sude angka naposona i. [1638†]

¹⁰Ibana maniaphon torop angka bangso ni parbegu, jala dibunu raja angka na marhuaso:

¹¹Si Sihon, raja ni halak Amori, dohot si Og, raja ni Basan ro di sude angka harajaon Kanaan. [1639†]

¹²Dung i dilehon Ibana tanonasida bahen partalian, partalian ni Israel, bangsona i. [1640†]

¹³Ale Jahowa, ro di salelenglelengna do goarmu, marsundutsundut do parningotanmu, ale Jahowa. [1641†]

¹⁴Ai luluhonon ni Jahowa do sogot bangsona i, jala marpangulahi do sogot rohana mida angka naposona i. [1642†] II.

¹⁵Ianggo angka ajiajian ni parbegu perak do jala sere, jadijadian ni tangan ni jolma.

¹⁶Marpamangan do nasida hape ndang mangkuling; marmata do nasida, hape ndang marnida.

¹⁷Marpinggol do nasida, hape ndang marbinege, huhut ndang adong hosa di bagasan pamangannasida.

¹⁸Sobokkon angka i do sogot jolma angka na jumadihonsa, sude angka na marhaposan tusi.

¹⁹Hamu ale pinompar ni Israel, puji hamu ma Jahowa; hamu ale pinompar ni si Aron, puji hamu ma Jahowa! [1643†]

²⁰Hamu ale pinompar ni si Lepi, puji hamu ma Jahowa! Hamu ale angka na mangkabiari Jahowa, puji hamu ma Jahowa!

²¹Pinuji ma Jahowa sian Sion, Ibana na maringanan di Jerusalem. Halleluya!