Read Batak Toba PSALMEN 143 Bible Online

PSALMEN 143 - Batak Toba bible

PSALMEN 143

¹Ende sian si Daud. Ale Jahowa, sai tangihon ma tangiangki, patinggil pinggolmu umbege anggukkon, sai alusi ma ahu di bagasan habonaronmu, hombar tu hatigoranmu.

²Jala unang tung boan naposom tu paruhuman, ai ndang adong na tigor roha manang ise, na mangolu maradophon bohim. [1696†]

³Ai sai diburu musu i do tondingki, tung didegehon do ngolungku tu tano, tung dipahundul do ahu tubagasan haholomon marimpotimpot, songon halak naung laon mate. [1697†]

⁴Jala naung mandate do tondingku di bagasan ahu, naung malampot do rohangku di bagasan.

⁵Sai * hupaingotingot do angka ari na robi, sai mamingkiri do ahu di angka pambahenanmu sudena, sai manimbangi do rohangku di angka jadijadian ni tanganmu. [1698†]

⁶Sai hupaherbang do tanganku tu Ho, songon tano na so maraek do pangkalungunhon ni * tondingku tu Ho. Sela! [1699†]

⁷Hapogani ma mangalusi ahu, ale Jahowa, naeng mandate tondingku: Unang tung tabunihon bohim maradophon ahu, asa unang tung doshon angka na manuruk tanoman ahu. [1700†]

⁸Sai patubegehon ma tu ahu manogotna i asi ni roham, ai marhaposan tu Ho do ahu. Sai pabotohon ma tu ahu dalan sidalananku, ai sai tu Ho do tinuju ni rohangku. [1701†]

⁹Sai palua ma ahu sian angka musungku, ale Jahowa! Tu Ho do ahu martanobato.

¹⁰Sai ajari ma ahu mangulahon lomo ni roham, ai Ho do Debatangku, tondim na denggan i ma manogihon ahu di tano na hornop!

¹¹Ala ni goarmu, ale Jahowa, sai * pangolu ma ahu, paruar ma tondingku sian parmaraan marhitehite hatigoranmu! [1702†]

¹²Jala dibahen asi ni roham, sai siaphon ma angka musungku, jala rendephon sude angka na manosak tondingki, ai naposom do ahu.