Read Batak Toba PSALMEN 145 Bible Online

PSALMEN 145 - Batak Toba bible

PSALMEN 145

¹Ende pujipujian sian si Daud. Patimbulonku ma Ho, ale Debatangku, Ho ale Raja, jala pujionku ma goarmu ro di salelenglelengna.

²Ganup ari do pujionku Ho, jala pasangaponku goarmu ro di salelenglelengna.

³Timbul do Jahowa, jala sipujion situtu, tung na so hadodoan do hatimbulonna i. [1715†]

⁴Sai na masitonaan do angka sundut papujipuji angka jadijadianmu jala masipaboaan do nasida di hagogoonmu angka na sumurung i.

⁵Sai papingkirpingkironku do hinauli ni hamuliaonmu na sangap i, dohot angka barita ni halongangan angka na binahenmu.

⁶Jala ingkon paboaboaon do hagogoon ni halongangan angka na binahenmi, jala pajojoronku do angka hatimbulonmu.

⁷Ingkon doras do pararaton parningotan ni denggan ni basam na godang i, jala marolopolop nasida mida hatigoranmi.

⁸Partalup jala parasiroha do Jahowa, lambas do Ibana tarrimas jala pardengganbasa bolon. [1716†]

⁹Pardengganbasa do Jahowa di saluhutna, jala dilinggom asi ni rohana do jadijadianna sudena. [1717†]

¹⁰Mandok mauliate ma sude jadijadianmu tu Ho, ale Jahowa, jala dipuji angka na niasianmu do Ho. [1718†]

¹¹Dibaritahon nasida do hamuliaon ni harajaonmu, jala diparhatopot nasida hagogoonmu na sumurung i.

¹²Laho pabotohon tu jolma manisia angka hagogoonna i, dohot hamuliaon ni harajaonna na sangap i. [1719†]

¹³Harajaon ro di sude angka saleleng ni lelengna do harajaonmu, jala panggomgomionmu ro di sude angka sundut. [1720†]

¹⁴Jahowa do situngkol sude angka na naeng tinggang, jala * sipahehe sude angka na tungki marroha. [1721†]

¹⁵Mangaranap tu Ho do angka mata ni sasudena, jadi dilehon Ho tu nasida sipanganonnasida di tingkina be. [1722†]

¹⁶Dibungka Ho do tanganmu pasombu lomo ni roha ni nasa na mangolu.

¹⁷* Nabonar do Jahowa di saluhut angka dalanna jala basa di bagasan saluhut jadijadianna i. [1723†]

¹⁸Donok do Jahowa di sude angka na manjou Ibana, tongon tahe di sude angka na manjou Ibana di bagasan hasintongan.

¹⁹Ibana mambahen lomo ni roha ni angka na mangkabiari Ibana, jala dibege do angguknasida i, jala dipalua do nasida. [1724†]

²⁰Jahowa do pangondingan ni sude angka na mangkaholongi Ibana, jala disiaphon do sude angka parjahat.

²¹Ingkon baritahonon ni pamanganku do pujipujian di Jahowa, jala nasa sibuk mamuji goarna na badia i ro di salelenglelengna.