Read Batak Toba PSALMEN 18 Bible Online

PSALMEN 18 - Batak Toba bible

PSALMEN 18

¹Ende sian si Daud, naposo ni Jahowa, na mandok hata ni ende on tu Jahowa, dung malua ibana dibahen sian tangan ni angka musuna sudena dohot sian tangan ni si Saul, ninna ma:

²Holong situtu do rohangku di Ho, ale Jahowa, Sipargogoi ahu.

³Jahowa do * partanobatoanku dohot haporusanku, jala Sipalua ahu, Debatangku. Sitiopanku, marhaposan tu Ibana do ahu, ** lombulombungku dohot + tanduk ni partuaonku, haporusanku. [169†]

⁴Sai * hupajoujou do Jahowa, Sipujion i, jadi malua ma ahu sian angka musungku. [170†]

⁵Nunga nian dihaliangi angka * jorat ni hamateani ahu, jala disonggoti angka + sunge ni hajahaton ahu. [171†]

⁶Nunga nian dihaliangi rante ni banuatorui ahu, dilungkupi angka * jorgong ni hamateani ahu. [172†]

⁷Jadi di na targogot i ahu, hujou do Jahowa jala hupangiar do anggukku tu Debatangku; jadi dibege ma soarangki sian * jorona, jala tolhas do angguk i tu pinggolna. [173†]

⁸Jadi humuntalhuntal ma tano on jala lumpat angka ojahan ni dolok jala lalolalo, ai tarrimas do Ibana. [174†]

⁹Martimpul do timus sian igungna, jala rungkar do api na mandilatdilat sian pamanganna, gara ni api na marnalanala ruar sian Ibana. [175†]

¹⁰Dung i dipajomba Ibana ma angka langit, gabe tuat Ibana, * holom marimpotimpot di toru ni patna. [176†]

¹¹* Marsihundul di kerubim ma Ibana huhut habang, jala mangareapreap di atas habong ni alogo. [177†]

¹²Haholomon do dibahen pangondinganna humaliang Ibana, parhobot ni udan dohot ombun do lapelapena. [178†]

¹³Mamolus do sian angka ombunna i ambolas dohot gara ni api, dibahen sinondang na di jolona i.

¹⁴Mangkuling do ronggur di angka langit dibahen Jahowa, jala dipalu na Tumimbul i do soarana. Ambolas dohot gara ni api do mangihut.

¹⁵Dung i disiorhon ma angka sumbiana, jala dipaserak angka musu, dijotjoti ma maniorhon angka hilap, manggunturi nasida. [179†]

¹⁶Jadi tarida ma angka lubuk ni aek, gabe mullop ma dohot angka ojahan ni portibi on maradophon pangasupim, ale Jahowa, maradophon pangunsong ni hosa ni igungmu.

¹⁷* Disurdukkon do tanganna sian ginjang manangkup ahu, manait ahu sian + angka aek magodang. [180†]

¹⁸Dipalua do ahu sian musungku na gogo i dohot sian angka na mangkosom ahu, ala gumogo do nasida sian ahu. [181†]

¹⁹Dirampok nasida do ahu di ari hinamagongki, jadi Jahowa ma pangunsandeanku.

²⁰Jala ditogihon do ahu tu * halambason, dipalua do ahu, ai lomo do rohana mida ahu. [182†]

²¹Hombar tu hatigoranku do dibaloshon Jahowa tu ahu; hombar tu * habontoron ni tanganku do dipasuang tu ahu. [183†]

²²Ai hujujur do angka dalan ni Jahowa, jala ndang manjahati ahu marbalik sian Debatangku.

²³Ai sai tong di jolongku sude angka uhumna, jala ndang hupaholang angka patikna i sian ahu. [184†]

²⁴Sai * sun do lidang ni rohangku mardonganhon Ibana, jala sai hujaga do diringku maradophon + hajahatonku. [185†]

²⁵Jadi dibaloshon Jahowa ma tu ahu hombar tu hatigoranku, hombar tu halidangon ni tanganku, na niidana i. [186†]

²⁶Asi do roham tu na asi roha i, tobok do Ho maradophon halak na tobok i.

²⁷Bontor do Ho dompak na bontor roha i, jala pulos do roham tu pargeduk i.

²⁸Ai ditumpahi Ho do jolma na dangol i, jala dipajimput Ho do jolma * parmata na elak. [187†]

²⁹Ai marsinondang do * parpalitoanku dibahen Ho, dipatiur Jahowa, Debatangku, do holom ni parnidaanku. [188†]

³⁰Ai mardonganhon Ho tartondong ahu do parduan ni parangan, jala mangasahon Debatangku tartimbung ahu do parik na timbo. [189†]

³¹* Sisangunjur do dalan ni Debata, ** pita do hata ni Jahowa, Ibana do + lombulombu ni sude angka na marhaposan tu Ibana. [190†]

³²Ai tung ise ma Debata, dungkon ni Jahowa, jala tung ise tau partanobatoan, dungkon ni Debatanta. [191†]

³³Debata do mangkohoshon pargogo tu ahu, jala dipatiur do dalanku.

³⁴Doshon doras ni tini do pathu dibahen, jala dipajongjong do ahu tu angka * habuntulonku. [192†]

³⁵Ibana mangajari tanganku mangula hamusuan, asa tarbahen botohonku manintak sior haksa. [193†]

³⁶Jala dilehon Ho do tu ahu lombulombu ni hatuaonmi, jala ditungkol siamunmu do ahu, jala habasaonmu do patimbul ahu. [194†]

³⁷Dipalumbang Ho do langkangku, jadi ndang tarbaliksu mata ni ari ni tothu. [195†]

³⁸Sai hulotongi do angka musungku, gabe dapot ahu do nasida, jala ndang mulak ahu paima siap nasida hubahen.

³⁹Huropuhi do nasida, jadi ndang tarbahen nasida be hehe, marragean do nasida tu toru ni tothu.

⁴⁰Dihohoshon Ho do pargogo tu ahu, mangula hamusuan, dipapatu Ho do angka alongku tu ahu.

⁴¹* Dipaunduk Ho do angka musungku, gabe siap hubahen angka na mangkosom ahu. [196†]

⁴²Mangangguhi do nasida, hape ndang adong na paluahon, tu Jahowa pe, hape ndang olo Ibana mangalusi nasida. [197†]

⁴³Jadi hulamoti ma nasida songon orbuk maradophon alogo, hulutluti ma nasida songon gambo di alaman. [198†]

⁴⁴Dipalua Ho do ahu sian angka parbadaan ni bangso, dipabangkit Ho do ahu, gabe * pandapotan ni angka parbegu, gari halak na so hutanda mangoloi ahu. [199†]

⁴⁵Guru dokku do nasida, halak na pulik marga pe mangalesemlesem ahu.

⁴⁶Merus do anak ni na pulik margai, jala angka hitir do nasida ruar sian partanobatoannasida.

⁴⁷Mangolu do Jahowa, jala pujion ma partanobatoanki, jala timbul do Debata ni hatuaonku. [200†]

⁴⁸Debata do Silehon angka partubolon tu ahu dohot papatuhon angka bangso tu ahu.

⁴⁹Ibana sipalua ahu sian angka musungku, Ho do tongon patimbul ahu maralohon angka alongku, dipalua Ho do ahu sian jolma sibahen gogo.

⁵⁰Dibahen i pujionku ma Ho, ale Jahowa, di tongatonga ni angka parbegu, jala endehononku ma goarmu. [201†]

⁵¹Ibana Sipatimbul angka hatuaon ni rajana, jala Sibahen asi ni roha tu miniahanna i, tu si Daud dohot tu pinomparna i ro di salelenglelengna. [202†]