Read Batak Toba PSALMEN 30 Bible Online

PSALMEN 30 - Batak Toba bible

PSALMEN 30

¹Ende sian si Daud laho pasahathon bagas i tu Debata. [331†] I.

²Patimbulonku ma Ho, ale Jahowa, ai Ho do mangenet ahu sian godung, jala ndang dipalas Ho roha ni angka musungku mida ahu. [332†]

³Ale Jahowa, Debatangku, tu Ho do ahu mangangguhi, jadi dipamalum Ho ahu. [333†]

⁴Ale Jahowa, nunga dipanangkok Ho tondingku sian banua toru, nunga dipangolu Ho ahu sian angka na manuruki hinambor. [334†]

⁵Puji ma Jahowa, hamu ale angka na niasianna, jala endehon hamu ma barita ni habadiaonna i! [335†]

⁶Ai * tongkin do panombo ni rimasna, alai saleleng mangolu do ianggo asi ni rohana; botarina i sorang partangison, hape + manogotna i masa parolopolopon. [336†] II.

⁷Alai anggo ahu ningku do, saleleng sonang ahu: ndang tagamon humordit ahu salelenglelengna. [337†]

⁸Ho do, ale Jahowa, pagonting dolokku sian denggan ni basam; ditabunihon Ho do bohim, jadi tarhatotong ahu.

⁹Tu Ho do ahu joujou ale Jahowa, jala tu Jahowa do ahu marhuraja.

¹⁰Tung aha ma labam di mudarhi, di hatutuathu tu godung? Tung tagamon ma pujion ni orbuk Ho, manang manjamitahon hasintonganmi? [338†]

¹¹Sai tangihon ma, ale Jahowa, jala asi roham mida ahu! Sai Ho ma Sipartumpak di ahu ale Jahowa!

¹²Nunga dihosing Ho andungku gabe endengku, nunga ditanggal Ho horingku, dung i dihohoshon Ho do tu ahu las ni roha. [339†]

¹³Asa pujion ni hamuliaon tondingku Ho, ndang marpansadian. Sai pujionku do Ho, ale Jahowa, Debatangku salelenglelengna. [340†]