Read Batak Toba PSALMEN 34 Bible Online

PSALMEN 34 - Batak Toba bible

PSALMEN 34

¹Ende sian si Daud, uju nalalaen ibana dipaula di jolo ni raja Abimelek, na palahohon ibana, gabe muli ibana. [394†] I.

²Pujionku ma Jahowa sipatsipat ni ari, sai tong ma pujipujianna di bagasan pamanganku. [395†]

³Jahowa do dipartanggulhon rohangku, begeon ni angka * na dangol ma i, jadi las ma rohanasida. [396†]

⁴Dongani hamu ma ahu * pasangaphon Jahowa, rap ma hita patimbulhon goarna i. [397†]

⁵Hulului do Jahowa, jadi dialusi ahu, jala dipalua ahu sian angka hagogotanku sudena.

⁶Sai manatapnatap nasida tu Ibana, jadi sihar ma panailinasida, jala na so tupa tarila bohinasida i. [398†]

⁷Joujou do na dangol on, gabe ditangihon Jahowa, jala dipalua do ibana sian hagogotanna sudena. [399†]

⁸Marsaro do suruan ni Jahowa humaliang angka na mangkabiari Ibana, jala dipalua nasida. [400†]

⁹* Dai jala ida hamu denggan basa ni Jahowa, + martua ma baoa na marhaposan tu Ibana. [401†]

¹⁰Habiari ma Jahowa, hamu ale angka na badiana! * Ai ndang hurangan angka na mangkabiari Ibana. [402†]

¹¹Anturaparon jala haleon on do angka anak ni singa, alai ndang hurangan di nasa na denggan angka na mangalului Jahowa. [403†] II.

¹²* Ro ma hamu, ale angka anaha, manangihon hatangkon, asa + huajarhon tu hamu parture ni biar mida Jahowa. [404†]

¹³Ise do baoa na mangkalomohon hangoluan on, mangkaholongi ariari marnida na denggan. [405†]

¹⁴Sai jaga ma dilam maradophon hajahaton, jala bibirmu maradophon pangkuling sipaotooto. [406†]

¹⁵Sumurut ma ho sian hajahaton, jala ulahon na denggan, lulu i hasonangan jala pareak ma i. [407†]

¹⁶Sai manatap do mata ni Jahowa tu angka partigor, jala pinggolna tu angguknasida. [408†]

¹⁷Matua alo ni angka sibahen na jat do bohi ni Jahowa, asa * disiaphon sian tano on baritanasida i. [409†]

¹⁸Mangangguhi do angka partigor, gabe ditangihon Jahowa do, jala dipalua nasida sian hagogotannasida sudena.

¹⁹Donok do Jahowa di angka na bojok marroha, jala ditumpahi do angka na pogos tondi. [410†]

²⁰Lan pe parniahapan ni partigor, alai dipalua Jahowa do ibana sian sudena i. [411†]

²¹Ibana mangaramoti holiholina sudena, ndang maponggol nanggo sada. [412†]

²²Sai hamatehonon ni parjahat do hajahaton, jala sai marutang do sogot angka na mangkosom partigor.

²³Ditobus Jahowa do hosa ni angka naposona, jala ndang marutang sogot sude na marhaposan tu Ibana. [413†]