Read Batak Toba PSALMEN 35 Bible Online

PSALMEN 35 - Batak Toba bible

PSALMEN 35

¹Ende sian si Daud. I. [1] Badai, ale Jahowa, angka na mambadai ahu, musu i angka na mamusui ahu. [414†]

²Sintak ma lombulombu na bidang dohot na metmet, jala hehe ma Ho mangurupi ahu. [415†]

³Hitir i ma hujur, jala ambat angka na mangalele ahu, dok ma tu rohangku: Ahu do hatuaonmi.

⁴Ingkon maila jala murak ma nian sogot angka na mangalotongi hosangki, sai sumurut tu pudi jala tarjimput ma angka na marsangkapi hamagoanku. [416†]

⁵Ingkon sobokkon rapanrapan ma nasida maradophon alogo, jala suruan ni Jahowa ma mamonsa nasida. [417†]

⁶Sai gabe haholomon dohot hamororon ma dalannasida i, jala suruan ni Jahowa mangalotongi nasida. [418†]

⁷Ai * buni do ditaon nasida jorgongna dompak ahu soada alana, ** dihali do sada godung padapot hosangku nian, + soada alana. [419†]

⁸Sai ro ma tu ibana hadodobur, so pangkirimanna, jala * jorgongna, na tinaonna i buni padapot ibana, mardobur ma ibana tubagasan. [420†]

⁹Asa marolopolop rohangku mida Jahowa, jala marhinsa mida hatuaon na sian Ibana.

¹⁰Ingkon sude angka holiholingku mandok: Ale Jahowa, * ise ma songon Ho, na paluahon na dangol sian na gumogo sian ibana, nang na dangol dohot na pogos sian na mandobo ibana! [421†]

¹¹* Hehe do angka sitindangi hajahaton, + na so hupabotoboto do diusousoi tu ahu. [422†]

¹²* Najat do dibahen nasida tu ahu balos ni na denggan; tarduru do hosangku dibahen. [423†]

¹³Ianggo ahu nian, hori do abithu * jumpa marsahit nasida, hupapeak do rohangku marpuasa, jala mulak tu ampuanku do tangiangku. [424†]

¹⁴Sobokkon aleale, sobokkon dahahang ibana pangalahongku hubahen, tungki jala donda do pangalangkangku, songon na marhinamagohon ina.

¹⁵Hape marlas ni roha jala marpungupungu do nasida di hadadapothon, marpungupungu pallampusung, angka na so hutanda tumahi ahu, sai marlesanlesan do nasida, ndang marpansohotan.

¹⁶Udur do nasida dohot angka simanggoanggo patungoripon dompak ahu. [425†] II.

¹⁷Ale Tuhan, sadia leleng on do paidaidaonmu? Sai paulak ma hosangku sian hamagoan binahennasida, sian anak ni singa * hosangku na tarpunjung. [426†]

¹⁸Pujionku ma Ho di luhutan na balga, jala baritahononku ma Ho di hatorapan. [427†]

¹⁹Sai unang ma marlas ni roha angka musungku pangansi mida ahu, * angka na mangkasomorhon ahu, soada dalanna, + angka na masihidopan. [428†]

²⁰Ai ndada hadameon dihatahata nasida, sai ditubutubui do hata sipaotooto dompak angka partobok isi ni tano i. [429†]

²¹Jala sai dipangangang do babanasida dompak ahu, angka ninna do: E, debai, e, debai! Ndi nunga tung huida hami! [430†]

²²Diida Ho do i, ale Jahowa, unang sai sip Ho! Unang mandaodao Ho sian ahu, ale Tuhan!

²³Sai ngot ma Ho jala tarsunggul mangaluluhon uhum di ahu di parbadaankon, ale Debatangku jala Tuhanku. [431†]

²⁴Sai uhumi ma ahu hombar tu hatigoranmu, ale Jahowa, Debatangku, asa unang marlas ni roha nasida mida ahu.

²⁵Asa unang angka didok di bagasan rohanasida: E, debai, i ma lomo ni rohanami! Unang tardok nasida; nunga hupolgaki hami ibana. [432†]

²⁶Ingkon maila ma nian jala murak saluhut angka na mangkalashon hinamagongki, maruloshon * hailaon dohot haurahon ma angka na manggakgak dompak ahu. [433†]

²⁷Sai marolopolop jala marlas ni roha ma angka na mangkalomohon hatigoranki, angka na tongtong mandok: Timbul do Jahowa, na lomo roha di hasonangan ni naposona! [434†]

²⁸Jala sai paboaboaon ni dilangku do hatigoranmi, sipatsipat ni ari pujionna Ho. [435†]