Read Batak Toba PSALMEN 36 Bible Online

PSALMEN 36 - Batak Toba bible

PSALMEN 36

¹Ende sian si Daud, naposo ni Jahowa. I.

²Di bagasan rohangku do pangkuling ni pangalaosion tu parjahat i: Ndang marhabiaran tu Debata rohana. [436†]

³Laos i do mangela ibana paimpolimpol matana mangulahon hajahatonna, sunisunian i. [437†]

⁴Getegete dohot pangansion do hatahata ni pamanganna, nunga mansadi ibana mamingkiri mangulahon na denggan.

⁵Getegete nama dipingkiri di atas podomanna i, dalan na so ture i nama ditopot, ndang be dihabiashon najat i. [438†] II.

⁶* Tolhas ro di langit do angka asi ni roham, ale Jahowa, tolhas ro di angka ombun do hasintonganmu. [439†]

⁷Sobokkon angka * dolok ni Debata do hatigoranmu, doshon + aek na sumar do angka panguhummu, diparmudu Ho do jolma dohot pinahan ale Jahowa. [440†]

⁸Tung na arga situtu do asi ni roham, ale Debata! Jadi marhaporusan di * parlinggoman ni habongmu do angka anak ni jolma. [441†]

⁹Dihamahaphon nasida do tabotabo ni bagasmu, jala dipainumhon Ho do tu nasida sian batang aek ni angka hahinsaonmi Edenmi. [442†]

¹⁰Ai di lambungmi do * mual hangoluan, di bagasan + hatiuronmi huida hami hatiuron. [443†]

¹¹Sai panene ma asi ni roham tu angka * na tumanda Ho jala hatigoranmu tu angka na unjur marroha. [444†]

¹²Sai unang ditunjang tot ni haginjangon ahu, jala sai unang dilotongi tangan ni angka parjahat i ahu.

¹³Marragean ma disi angka siulahon hajahaton, diompashon do nasida, jadi ndang tarbahen nasida be hehe. [445†]