Read Batak Toba PSALMEN 42 Bible Online

PSALMEN 42 - Batak Toba bible

PSALMEN 42

¹Ende sipodaon sian angka anak ni si Kora. I.

²Songon pangkalungunhon ni ursa di angka guluan, songon i do pangkalungunhon ni tondingku tu Ho, ale Debata. [537†]

³Mauas do tondingku * di Debata, ni Debata na mangolu i, andigan pe tolhas ahu, asa huida bohi ni Debata? [538†]

⁴Sai iluilungku do sipanganonku arian dohot borngin, ai manipat ari do dipandok tu ahu: * Didia do Debatam? [539†]

⁵Molo sapala marningot ahu disi, jadi * use ma huhilala rohangku di bagasan: + Na udur i ahu najolo rap dohot angka natorop manopot bagas ni Debata, huhut marsoara olopolop dohot pujipujian rap dohot angka na laho marari raya. [540†]

⁶Boasa sai tungki ho, ale tondingku, jala boasa sai rusak ho di bagasan ahu? Haposi ma Debata, ai sai na pujionku dope Ibana, hatuaon ni bohingku jala Debatangku. [541†] II.

⁷Tungki do rohangku di bagasan, dibahen i marningot do ahu di Ho sian luat martopihon Jordan, dohot sian Hermon, sian dolok Misar.

⁸Sai masiharaan do angka sampuran dibahen soara ni hasakmu, sude angka ombakmu dohot galumbangmu manghungkupi ahu. [542†]

⁹Alai diparbagabaga Jahowa do asi ni rohana arian, * borngin pe sai mamuji jala martangiang do ahu tu Debata ni hangoluanku. [543†]

¹⁰Jadi ningku do mandok Debata, * partanobatoanki: Boasa tung dihalupahon ho ahu? + Boasa ingkon sai martujungtujung ahu mardalan dibahen pangarsahi ni musu? [544†]

¹¹Nunga magopu hian holiholingku, lam diinsahi angka musungku do ahu, ai dipandatdati nasida do ganup ari mandok tu ahu: Didia do Debatam? [545†]

¹²Boasa sai tungki ho, ale tondingku, jala boasa sai rusak ho di bagasan ahu? Haposi ma Debata, ai sai na pujionku dope Ibana, hatuaon ni bohingku jala Debatangku. [546†]