Read Batak Toba PSALMEN 44 Bible Online

PSALMEN 44 - Batak Toba bible

PSALMEN 44

¹Ende sipaingot sian angka anak ni si Kora. I.

²Ale Debata, nunga sar dibege pinggolnami, dipajojor angka ompunami tu hami, pambahenan na binahenmi di ngolunasida, di angka ari na robi. [552†]

³Dipabali Ho do marhitehite tanganmu angka parbegu asa mangalopokkon ianggo nasida; disiaphon Ho do angka bangso, alai dipararat Ho do ianggo nasida. [553†]

⁴Ai ndada marhitehite * podangnasida disoluk nasida tano i, jala ndada botohonnasida mambahen marantu nasida; tangan siamunmi dohot botohonmi dohot hatiuron ni bohim do tahe, ai + dihalomohon Ho do nasida. [554†]

⁵Apala Ho sandiri do * rajangku, ale Debata! Sai paborhat ma angka + hatuaon ni si Jakkob. [555†]

⁶Mangasahon Ho duguduguhononnami ma angka musunami, mangasahon goarmi luntahonnami ma angka alonami. [556†]

⁷Ai ndada siorhu na huhaposi jala ndada podangki pamonang ahu. [557†]

⁸Ho do tahe pamonang hami maradophon musunami, Ho do mambahen tarurak angka na mangkasomorhon hami.

⁹Mangasahon Debata hami mamuji manipat ari, jala mandok mauliate hami di goarmi salelenglelengna. Sela! II.

¹⁰Hape diambolongkon jala dipaurak Ho do hami nuaeng, jala ndang borhat Ho mandongani parangannami. [558†]

¹¹Dipaundarundar Ho do hami maradophon musu, gabe dipupusi angka na mangkasomorhon hami do hami.

¹²Dilehon Ho hami songon birubiru sipanganon, jala dipaserak Ho do hami tu tongatonga ni angka parbegu. [559†]

¹³Diseaseahon Ho do bangsom manggadissa, jala ndang dipanaeknaek Ho asamnasida. [560†]

¹⁴Dibahen ho do hami sieleseleson ni hombar hundulnami, parbilean dohot marhaurahon di angka na humaliang hami. [561†]

¹⁵Dibahen Ho do hami * parumpamaan di tongatonga ni angka parbegu, + paregolegolan ni ulu di tongatonga ni angka bangso. [562†]

¹⁶Sai solpa do di jolongku haurahonku ganup ari, jala hailaon ni bohingku manghungkupi ahu. [563†]

¹⁷Maradophon soara ni pangelesi dohot panginsahi, maradophon musu dohot panuboli. III.

¹⁸Ro pe sudena i tu hami, laos so huhalupahon hami Ho, jala ndang huose hami padan binahenmu.

¹⁹Ndang sumurut tu pudi rohanami, jala ndang manimbil langkanami sian dalanmi. [564†]

²⁰Hape diropuhi Ho do hami di parbueaan, jala dilungkuphon Ho do tu hami linggoman hamatean.

²¹Tung sura huhalupahon hami goar ni Debatanami, jala * hupaherbang hami tangannami tu Debata sileban: [565†]

²²Tung so sisiran ni Debata i? Ai Ibana do tumanda angka sibunian ni roha. [566†]

²³Ai humongkop Ho do umbahen dibunui hami ganup ari, doshon birubiru sipotongon do hami di rohanasida. [567†]

²⁴Ngot ma Ho! Boasa sai modom Ho, ale Tuhan? Tarsunggul ma Ho, unang ambolongkon hami salelenglelengna. [568†]

²⁵Boasa tung tabunihononmu bohim, halupahononmu pardangolan dohot hagogotannami? [569†]

²⁶Ai tungki do rohanami ro di sumanggo, lohot tu tano do butuhanami. [570†]

²⁷Sai hehe ma Ho mangurupi hami, jala palua hami, ala asi ni roham!