Read Batak Toba PSALMEN 55 Bible Online

PSALMEN 55 - Batak Toba bible

PSALMEN 55

¹Ende sipodaon sian si Daud. I.

²Sai tangi ma tangiangku, ale Debata, jala unang martabuni Ho maradophon parhurajaionku. [671†]

³Tangihon ahu jala alusi ahu, sai monsong do pingkiranku jala marhoi ahu.

⁴Ala ni pangkuling ni musu i, ala ni panosak ni parjahat i; ai sai * manggulang hamagoan do nasida tu ahu, jala marmurukmuruk situtu nasida mangkasomorhon ahu. [672†]

⁵Mamalingi do rohangku di bagasan ahu, jala * hasosonggot ni hamatean maninggang ahu. [673†]

⁶Dironron habiaran jala panonditnonditon ahu jala dihungkupi hatahuton do ahu. [674†]

⁷Jadi ningku ma: Ise ulaning mangalehon tu ahu habong songon darapati! Asa habang ahu jala mangulon manang didia. [675†]

⁸Ida ma, dao ma ahu jaur, marmalammalam di halongonan. Sela! [676†]

⁹Halaputanku ma haporusan sada di ahu maradophon alogo maruohok, maradophon habahaba. [677†]

¹⁰Siaphon ma nasida ale Tuhan, * bolabola ma dilanasida i! Ai uhum gogo dohot parsalisian huida di bagasan huta i. [678†]

¹¹Arian dohot borngin diliati nasida pariknasida i, jala hajahaton dohot pardangolan masa di bagasan.

¹²Hajungkaton do di bagasan, jala ndang meret pangarupaon dohot sipaotooto sian onannasida i.

¹³Ai ndada musu na mangelesi ahu, taononku do i nian, ndada parsomor hian di ahu manenganenga dompak ahu, ua martabuni ahu anggo maradophon ibana.

¹⁴Hape jolma doshon ahu do ho, partogingku jala hasudungan ni rohangku. [679†]

¹⁵Rosu situtu do itabahen paralealeon, * rap mardalan do hita di hatorapan tu bagas ni Debata. [680†]

¹⁶Sai ditompuhon hamatean ma nian nasida, mangolu * songon i ma nian nasida tuat tu banuatoru, ai hajahaton do masa di bagasan inganannasida, di bagasan rohanasida. [681†] II.

¹⁷Ianggo ahu; tu Debata do ahu mangalualu, jadi sai tumpahan ni Jahowa ma ahu.

¹⁸Bodarina i dohot manogotna i, nang di hos ni ari, sai mangalualu jala mariale ahu, jadi tangihononna ma soarangki. [682†]

¹⁹Mardamedame hosangki ditobus Ibana, asa unang tarhahua nasida ahu, ai torop situtu do nasida mangalo ahu.

²⁰Martinangi do Debata, jala pajepolonna do nasida, * jala marhabangsa Ibana sian na robi. Sela! + Nasida na so olo muba, jala na so mangkabiari Debata. [683†]

²¹Mangonai do tanganna tu angka alealena, diose do padanna i.

²²Landitan do hata ni pamangannai sian miak susu, hape parbadaan do ditahi rohana; lumambok do hatahatana sian miak, hape baba ni podang do angka nasida. [684†]

²³Sai tu Jahowa ma pasahat parsorionmi, jadi Ibana ma pangoluhon ho, ndang tagamon loasonna partigor i humasusa ro di salelenglelengna. [685†]

²⁴Ianggo Ho, ale Debata, pangonjarhononmu do nasida tubagasan godung hamagoan, ndang eahon ni angka jolma sisopsop mudar dohot parjehe ariarinasida * satonga tubu; alai anggo ahu, Ho do na huhaposi. [686†]