Read Batak Toba PSALMEN 59 Bible Online

PSALMEN 59 - Batak Toba bible

PSALMEN 59

¹Ende sieheteheton sian si Daud, uju disuru si Saul marhal bagasna i naeng mambunu ibana. [715†] I.

²Sai palua ma ahu sian angka musungku, ale Debatangku, sai bahen ma partanobatoanku maradophon angka alongku.

³Sai palua ma ahu sian angka siulahon hajahaton, jala tumpahi ahu maradophon angka halak sisopsop mudar.

⁴Ai ida ma, diarop nasida do hosangku, sai marpungupungu do angka na begu mangalo ahu, so manang adong utangku manang dosangku, ale Jahowa.

⁵Sai marlojongi do nasida jala marhontas, so manang adong hajahatonku; * ngot ma Ho, manjumpangkon ahu jala tatap! [716†]

⁶Ngot ma Ho tutu, ale Jahowa Debata Zebaot, Debata ni Israel, maminsang sude angka parbegu i, sai unang ma marpamuati roham mida angka panggetegete sudena. Sela!

⁷Sai mulahulak do nasida bodarina i, mangorongi songon biang mangkaliangi huta i. [717†]

⁸Ida ma margumogumo do pamangannasida, mantat podang do bibirnasida i, ai tung ise ma umbegesa? [718†]

⁹Alai anggo Ho, ale Jahowa, marengkelengkelihon nasida, dilesanlesan Ho do angka parbegu sudena. [719†]

¹⁰Ale pargogongku, sai Ho do pangasahononku, ai Debata do partanobatoanku.

¹¹Sai tomutomuon ni Debatangku do asi ni rohana tu ahu, * sombu ma matangku mida angka alongku bahenon ni Debata. [720†] II.

¹²Sai unang tompu bunu nasida, asa unang bangsongku mangkalupahon i, sai paundarundar ma nasida hinorhon ni gogom, dung i * ragehon nasida, ale Tuhan, lombulombunami! [721†]

¹³* Dosa ni pamangannasida do hata ni bibirnasida i, sai tardapot ma nasida di haginjangonnasida i, ala ni pamuraion pe dohot gabus, na hinatahonnasida i. [722†]

¹⁴Sai siaphon ma nasida di panombo ni rimasmu, sai siaphon ma, asa pidom nasida, asa diboto nasida Debata do hape panggomgom di Jakkob ro di ujung ni tano on. Sela!

¹⁵Sai mulahulak do nasida botarina i, mangorongi songon biang, huhut dihaliangi huta i. [723†]

¹⁶Sai maotaot do nasida mangalului sisohalon, molo so mahap nasida, laos marmalam nasida.

¹⁷Alai anggo ahu, sai endehononku do hagogoonmu jala olophononku do * manogotna i asi ni roham, ai Ho do partanobatoanku jala haporusanku di ari hagogotanku. [724†]

¹⁸Endehononku ma Ho, ale pargogongku, ai Debata do partanobatoanku, Debata parasi roha di ahu.