Read Batak Toba PSALMEN 60 Bible Online

PSALMEN 60 - Batak Toba bible

PSALMEN 60

¹Ende sieheteheton dohot sipodaon sian si Daud.

²Uju na marmusu ibana dompak Ram di Mesopotamia dohot dompak Ram Zoba, di na mulak i si Joab, dung ditaluhon halak Edom di rura parsiraan, sampulu dua ribu halak toropna. [725†]

³Ale Debata, nunga dibolongkon jala dipaserak Ho hami, tarrimas do Ho, sai marpangulahi ma roham tu hami.

⁴Nunga digunsang jala dibola Ho tano on; sai padomu ma bolabolana i, ai nunga lalolalo. [726†]

⁵Nunga dipatuduhon Ho na bernit tu bangsom nunga dipainumhon Ho tu hami * anggur hagodoron. [727†]

⁶Alai dilehon Ho do muse tu angka na mangkabiari Ho sada * partonggol, pahinsa nasida ala ni hatigoran. Sela! [728†]

⁷Asa malua angka na niasianmi, sai manumpak ma siamunmi jala alusi hami!

⁸Nunga * marbagabaga Debata di bagasan habadiaonna i: Ingkon marolopolop ahu, marsagihon Sikem dohot manali rura Sukot. [729†]

⁹Ahu do nampuna Gilead jala ahu nampuna Manasse, jala Epraim do partanobatoan ni ulungku, * Juda do tungkot ni harajaonku. [730†]

¹⁰Moab do mangkuk parburianku, tu Edom hureongkon sipatungku, olophon ma ahu ale luat Palistim.

¹¹Ise ulaning manogihon ahu tu * huta na gonting i? Ise ulaning pataruhon ahu tolhas ro di Edom? [731†]

¹²Nda Ho do, ale Debata, Ho naung mambolongkon hami, jala * na so ruar, ale Debata mandongani parangannami? [732†]

¹³Sai patupa ma haluaon di hami sian hagogotan, ai ndang marnosan ianggo pangurupion ni jolma. [733†]

¹⁴Mangasahon Debata sai hamonangan do ulahononta, jala Ibana sandiri mangalotlot alontai. [734†]