Read Batak Toba PSALMEN 63 Bible Online

PSALMEN 63 - Batak Toba bible

PSALMEN 63

¹Ende sian si Daud, * uju di halongonan Juda ibana. [754†]

²Ale Debata, Ho do Debatangku, sogot do manogotna i dilului rohangku Ho, * mauas do rohangku di Ho, dihalungunhon nang dagingku Ho di tano na dangaron dohot na uasan, soada aek. [755†]

³Songon i do panataphu tu Ho di bagasan * bagas na badia i, + naeng marnida hagogoonmu dohot hamuliaonmu. [756†]

⁴Ai dengganan do asi ni roham sian hangoluan, sai pujion ni bibirhu ma Ho.

⁵Sai songon i ma pamujingku di Ho * saleleng ahu mangolu, mangasahon goarmu + paherbangonku ma tanganku tu ginjang. [757†]

⁶Mahap ma disi tondingku, songon na mangan tabotabo dohot na talmis, jala las roha ni bibir ni pamanganku mamujimuji. [758†]

⁷Molo sapala diingot rohangku Ho di atas podomanku, laos torus sabornginna i marhusari ahu taringot tu Ho.

⁸Ai Ho do manjadi pangurupion di ahu, jala tarbahen ahu marolopolop di linggom ni angka habongmu. [759†]

⁹Sai lohot tu Ho do rohangku, sai ditiop tanganmu siamun i do ahu. [760†]

¹⁰Alai anggo nasida, angka na mangalului hamagoan ni hosangku, sai tolhas do nasida sogot tu banuatoru. [761†]

¹¹Sai buaton ni podang do nasida sogot, gabe jambar ni angka gompul do nasida.

¹²Alai ianggo Rajai sai marlas ni roha do mangasahon Debata, sai marolopolop do sude * na marmangmang tu Ibana ai hona huntam do sogot pamangan ni angka sidon gabus. [762†]