Read Batak Toba PSALMEN 65 Bible Online

PSALMEN 65 - Batak Toba bible

PSALMEN 65

¹Ende sian si Daud. I.

²* Ingkon nalom ni roha di Ho do pujipujian, ale Debata di Sion, jala + gararon do tu Ho bagabaga. [771†]

³Ale sitangihon tangiang! Tu Ho do ro nasa sibuk. [772†]

⁴Gumogo do angka alualu ni hajahaton asa ahu, sai Ho ma manesa angka pangalaosionnami. [773†]

⁵Martua ma halak na pinillitmi, jala niloasmi dumonok, * manginganhon angka alamanmi! Sai pasabam ma rohanami binahen ni ** hinadenggan ni bagasmu, + jorom na badia i. [774†]

⁶Tung na songkal do pangalusim tu hami di bagasan hatigoran, ale Debata ni hatuaonnami, haposan ni saluhut ujung ni tano on dohot laut, angka na dao i. [775†]

⁷Ho do sipaojak angka dolok marhitehite gogom, marhohos hagogoon. [776†]

⁸Ho do sipaso hasak di angka laut, hasak ni angka galumbangna i dohot ogaoga ni angka bangso. [777†]

⁹Jadi mabiar ma angka partopi laut maradophon tanda angka na binahenmi, marolopolop ma dibahen Ho angka parmulaan ni habinsaran dohot hasundutan. [778†] II.

¹⁰Ditingkir Ho do tano on, * jadi sirnip ma, jala gabe situtu. Gok aek do mual ni Debata, manjadi do emenasida dibahen Ho, ai songon on do parpaulim: [779†]

¹¹Sirnip ma angka baruranna dibahen Ho, jadi buruk ma angka golena; ro muse udan na por, jadi sarge ma, jala dipasupasu Ho do na tubu disi. [780†]

¹²Nunga martumpal denggan ni basam partaonan i dibahen Ho, gok miak do angka bogasmi. [781†]

¹³Lomak situtu do panjampalan di halongonan, jala marhohos olopolop do angka robean. [782†]

¹⁴Hona tutup do angka panjampalan dibahen birubiru, angka rura pe dibahen eme; marolopolop huhut marende do angka nasida.