Read Batak Toba PSALMEN 66 Bible Online

PSALMEN 66 - Batak Toba bible

PSALMEN 66

¹Ende sian si Daud. I. [1] Marolopolop tu Debata ma, ale sandok tano on! [783†]

²Endehon hamu ma hamuliaon ni goarna, marmulia bahen hamu pujipujianna!

³Dok hamu ma mandok Debata: Tung na songkal do angka pambahenanmu! Binahen ni hinatimbul ni gogom ingkon marsomba tu Ho angka musum. [784†]

⁴Ingkon liat portibi on tahe marsomba tu Ho sogot, jala mangendehon Ho, mangendehon goarmu. Sela!

⁵Ro be ma hamu marnida angka pambahenan ni Debata, tung na songkal do pangarajaionna di manisia. [785†]

⁶Nunga dipauba Ibana laut i gabe mahiang, mardalan pat do nasida manaripari batang aek i, marlas ni roha do hita uju i mida Ibana. [786†]

⁷Matua Ibana mangarajai marhitehite hagogoonna i, sai mangaranapi matana tu angka bangso, asa unang dipaginjang angka panggunturi dirina. Sela! [787†] II.

⁸Puji ma Debatanami, hamu ale angka bangso, jala patubegehon hamu ma soara pujipujianna!

⁹Ibana mambahen hosanta mangolu, * jala ndang diloas totta tarsulandit. [788†]

¹⁰Ai nunga diunjuni Ho hami, ale Debata, nunga tung dilala Ho hami songon na mangalala perak. [789†]

¹¹Nunga ditogu Ho hami tubagasan aring, na dokdok situtu diampehon Ho tu gontingnami. [790†]

¹²Nunga diloas Ho * jolma na gale marhureta sian ulunami, nunga masuk hami + tubagasan api dohot aek, alai diparuar Ho do hami, gabe sabam situtu rohanami. [791†] III.

¹³Dibahen i masuhangku ma jabum, mamboan angka pelean situtungon, manggarar angka bagabagangku tu Ho. [792†]

¹⁴Angka naung pinapuas ni bibirhon, jala naung pinarbagabaga ni pamangankon, uju hagogotan ahu: [793†]

¹⁵Angka pelean situtungon sian birubiru na tinaruan do pelehononku tu Ho, angkup ni daupa sian hambing ro di lombu dohot birubiru tunggal pelehononku tu Ho. Sela!

¹⁶Ro be ma mananginangi sude hamu angka na mangkabiari Debata, asa hujamitahon naung binahen ni Debata tu tondingku. [794†]

¹⁷Tu ibana do joujou pamanganku, jala pujipujian mampe tu dilangku.

¹⁸Tung sura hajahaton ditahi rohangku, ndang tagamon tangihonon ni Tuhan i ahu. [795†]

¹⁹Tongon do, nunga ditangihon Debata ahu, nunga diparateatehon soara ni tangiangku.

²⁰Pinuji ma Debata, na so manulakkon tangiangku manang asi ni rohana pe sian ahu.