Read Batak Toba PSALMEN 68 Bible Online

PSALMEN 68 - Batak Toba bible

PSALMEN 68

¹Ende sian si Daud. I.

²Sai hehe ma Debata! Ingkon harhar angka musuna, jala maporus angka na mangkasomorhon Ibana maradophon bohina. [802†]

³Songon * pangombus di timus do ombushononmu nasida, + songon halalala ni pantis maradophon api, ingkon songon i ma marmagoan angka parjahat maradophon Debata. [803†]

⁴Alai sai marlas ni roha ma, marolopolop di jolo ni Debata ianggo angka partigor, sai marhasonangan ma nasida di bagasan las ni roha. [804†]

⁵* Endehon hamu ma Debata, puji hamu ma goarna i, + palendes hamu ma dalan di Ibana na marhureta di halongonan, Jahowa do goarna, jala marolopolop ma hamu di jolona. [805†]

⁶Ibana do ama ni angka na tading di lampin, jala pangondian ni angka na mabalu, Ibana do Debata di bagasan ingananna na badia i. [806†]

⁷Debata do mambahen hot ripe, angka na punjung hian; Ibana paruarhon angka na tarhurung tu hasonangan; alai anggo angka na marbalik maringan di halongonan na tungil situtu. [807†] II.

⁸Ale Debata, uju diuluhon Ho bangsom, uju mangalangka Ho, di bagasan * halongonan i: -- Sela! [808†]

⁹Humuntal do tano on, manetehi huhut angka langit maradophon Debata, nang dolok Sinai adui maradophon Debata, Debata ni Israel. [809†]

¹⁰Udan * lomo ni roha do dipangusehon Ho, ale Debata: Jala + dipargogoi Ho do parjambaranmu na heal i. [810†]

¹¹Jadi maringan ma disi angka na pinangolum, diparmudu Ho do na dangol i, ale Debata, marhitehite denggan ni basam.

¹²Martingting ma Tuhan i, jadi * torop situtu ma angka boruboru siboan barita na uli. [811†]

¹³Hapogan ma angka raja ni angka parduaan parangan maporus, jadi boru siingani jabu marbagihon tabantaban. [812†]

¹⁴Molo mangulon hamu di holangkolang ni angka parduaan, marsinondang do hamu songon habong ni darapati, na nilampis dohot perak, jala marsere na gorsing do holenasida. [813†]

¹⁵Uju dipaserak Pargogo-nasohatudosan angka raja disi, mamontar ma di atas dolok Salmon. [814†]

¹⁶Dolok ni Debata do dolok Basan, gok angka punsu do dolok Basan i.

¹⁷Boasa sai mangiburu hamu, ale angka dolok na timbo, dompak dolok Sion, na * pinillit ni Debata bahen ingananna? Sai inganan ni Jahowa do i salelenglelengna. [815†]

¹⁸* Marriburibu do hureta ni Debata, di tongatonganasida do Tuhan i, hira Sinai di bagasan habadiaon. [816†]

¹⁹Nunga * manaek Ho tu ginjang, ** ditaban Ho do na hona taban, nunga maruli + silehonlehon Ho di tongatonga ni manisia, nang angka na marbalik, asa maringan disi Debata Jahowa. [817†]

²⁰Pinuji ma Tuhan i ganup ari! Dokdok pe * dipaporsanhon tu hita, Debata do mangurupi hita. Sela! [818†]

²¹Debata ni angka hatuaon do Debatanta i, jala guru di Tuhan Jahowa do angka haluaon sian hamatean. [819†]

²²Tongon do sai rosahan ni Debata do ulu ni angka musuna, ulu parjambulan ni angka na mandatdati marpangalaho di bagasan dosana. [820†]

²³Nunga didok Tuhan i: Mulak do nasida boanonku sian Basan mulak do nasida * sian angka lung ni laut i. [821†]

²⁴Asa diburi Ho patmu di bagasan mudar, marjambar do dila ni angka biangmu sian angka musu i. [822†] III.

²⁵Nunga diida nasida * habobongotmu, ale Debata, habobongot ni Debatangku, rajangku tubagasan habadiaonna i. [823†]

²⁶Mardalan di jolo angka parende, di pudi ni angka parsarune di tongatonga ni na * marbaju, angka na mamalu doal. [824†]

²⁷Pinuji ma Debata di bagasan angka luhutan; Tuhan i, hamu ale angka na sian * mual ni Israel. [825†]

²⁸Disi do * si Benjamin siampudan pangarajainasida, angka induk sian Juda pe pasimpar, angka induk sian + Zebulon, angka induk sian Naptali. [826†]

²⁹Ditonahon Debata do hagogoonmu, sai pargogoi ma, * ale Debata, na pinatupam tu hami! [827†]

³⁰Ala jorom na di Jerusalem taruhonon ni angka raja do sogot silehonlehon tu Ho. [828†]

³¹Sai songgahi ma * buea na di tolongi, angka + jonggi na marhoronhoron rap dohot angka anak ni lombu ni angka bangso, asa dioloi nasida patu mangalehon jomba hahal. Ibana paserakkon bangso, angka na mangkalomohon hamusuon. [829†]

³²Ro do sogot angka na sumangap sian Misir, Kus pe hapogan do marsomba tu Debata. [830†]

³³Hamu ale angka harajaon di tano on, endehon hamu ma Debata, palu hamu ma parhinaloan mamuji Tuhan i! Sela!

³⁴Ibana na * marhitehitehon langit ni langitan sian narobi, ida ma, pangiaronna ma soarana, soarana na gogo i. [831†]

³⁵Sai * lehon hamu ma hahormaton tu Debata! + Hamuliaonna i do gumomgom Israel, jala di angka banua ginjang sahali do hagogoanna! [832†]

³⁶Songkal do Debata, ro sian ingananna angka na badia i! Debata ni Israel do Ibana, * silehon hagogoon dohot hamuliaon tu bangso i. Pinuji ma Debata! [833†]