Read Batak Toba PSALMEN 77 Bible Online

PSALMEN 77 - Batak Toba bible

PSALMEN 77

¹Ende sian si Asap. I.

²Tu Debata do hujoujouhon soarangkon, jala mangangguhi ahu, tu Debata do tongon soarangkon! Jadi ditangihon do ahu. [952†]

³Hulului do Tuhan i di ari hagogotanki, sai toltol do tanganku bornginna i, jala ndang marpansohotan, sai dipajuajua rohangku do apulon.

⁴Sai hupaingotingot Debata, jala marhoi; sai hupingkiri, jadi biahaton tondingku. Sela!

⁵Sai ditiopi Ho do langkop ni matangku, sai diumbani do ahu, jadi ndang tarbahen ahu mangkuling.

⁶Sai hupingkiri do angka ari na robi, angka taon naung leleng salpu. [953†]

⁷Sai hupaingotingot do pamiltikku di * parhinaloan bornginna i, sai marhusari do rohangku jala sai manangkasi do tondingku. [954†]

⁸Tung saleleng ni lelengna nama ulaning mambolongkon Tuhan i, jala ndang be ulahanna mardenggan basa? [955†]

⁹Tung naung marujung salelenglelengna nama ulaning asi ni rohana, tung pesan nama bagabaga i marsundutsundut?

¹⁰Tung naung lupa ma ulaning Debata marasi roha? Manang naung ditiopi angka asi ni rohana i dibahen murukna? Sela! II.

¹¹Jadi hudok ma: Hagaleonku do i, angka taon ni siamun ni Natumimbul do i. [956†]

¹²Sai pujionku do angka pambahenan ni Jahowa, ai sai ingotonku do halongangan angka na binahenna i sian na robi.

¹³Jala sai marhusari do ahu taringot tu angka pambahenanmu sudena, jala sai hutangkasi do angka jadijadianmu. [957†]

¹⁴Ale Debata, habadiaon do parhitean ni dalanmu! Dung Debata dia ma marhatimbulon songon Ho, ale Debata! [958†]

¹⁵Ho do Debata sipatupa halongangan, dipabotohon Ho do gogom tu angka bangso. [959†]

¹⁶Nunga dipalua Ho bangsomi marhitehite tanganmu, angka anak ni si Jakkob dohot si Josep. Sela! [960†]

¹⁷Diida angka aek i do Ho, ale Debata! Diida angka aek i do Ho, gabe margilinggiling angka gunsang ma dohot angka lung. [961†]

¹⁸Mangusehon aek ma angka ombun, marsaringar do angka aoangaoang, sumiksaksiksak ma huhut angka sumbiam.

¹⁹Marsaringar ma ronggurmu di bagasan halisungsung, disondangi angka hilap ma portibi on, humuntal jala lalolalo ma tano on.

²⁰Di bagasan laut do dalanmu, jala mardalan balobung do Ho di angka aek magodang, jala ndang tanda angka bogasmu. [962†]

²¹Diadu Ho do bangsom, * songon sada punguan marhitehite tangan ni si Musa dohot si Aron. [963†]