Read Batak Toba PSALMEN 78 Bible Online

PSALMEN 78 - Batak Toba bible

PSALMEN 78

¹Ende sipodaon sian si Asap. [1] Hamu ale bangsongku, sai tangihon hamu ma podangkon! Paeleng hamu ma pinggolmuna tu angka hata ni pamangankon.

²Bungkaonku ma pamanganku mandok umpama, manurasihon hulingkulingan sian na robi. [964†]

³Angka naung tabege jala na itaboto dohot * na pinajojor ni angka ompunta tu hita. [965†]

⁴Ndang porsoonta tu anaknasida, tu sundut na singkat sogot; baritahononta do angka pujipujian ni Jahowa ro di hagogoonna dohot halongangan, angka na binahenna i.

⁵Ai nunga dipatindang Ibana sada panindangion di Jakkob, jala dibahen do sada patik di Israel, na tinonahonna tu angka ompunta, asa * dipabotohon nasida tu anaknasida i. [966†]

⁶Asa diboto sundut na singkat sogot, anak angka situbuhononhon dope; ia dung magodang nasida, asa dipaboa muse tu anaknasida.

⁷Asa dibahen nasida Debata haposannasida i, jala unang dihalupahon angka pambahenan ni Debata, jala dijujur angka patikna i.

⁸Asa unang nasida doshon ompunasida, * sundut na marbalik dohot panggunturi, sundut na so patoguhon rohana, jala ndang marsihohot tondina tu Debata. [967†]

⁹Anak ni si Epraim, angka parsinjata sior, angka na mundar di ari hatongtangan i.

¹⁰Ndang diingot nasida padan binahen ni Debata, jala dijua nasida do mangihuthon tu patikna i.

¹¹Jala dihalupahon do angka pambahenanna i dohot halongangan angka na pinataridahonna i tu nasida.

¹²Dibahen Ibana do halongangan di adopan ni ompunasida i, di tano Misir, di adaran * Zoan. [968†]

¹³Dibola do laut i patariparhon nasida, jala diunsong do aek i doshon timbunan. [969†]

¹⁴Jala ditogihon nasida marhitehite ombun ia arian, jala marhitehite sondang ni api manipat borngin. [970†]

¹⁵Dibola do angka dolok batu di halongonan jala dipainum nasida doshon aek na marbuhalbuhal godangna. [971†]

¹⁶Jadi ruar ma angka sunge sian dolok batu i jala mabaor songon batang aek.

¹⁷Alai sai didatdati nasida dope mardosa dompak Ibana, mangalo Natumimbul i di tano bangkalbangkal. [972†]

¹⁸Jala sai diunjuni nasida do Debata di bagasan rohanasida laho martungguhon sipanganon guru roharohanasida. [973†]

¹⁹Jala marmungutmungut dompak Debata, angka ninna ma: Tung tagamon tarpatupa Debata ma padirihon sada meja di halongonan on?

²⁰Ida ma, nunga dilombut Ibana dolok batu i, jadi martihaltihal ma aek, jala gas andalu angka batang aek; tarpatupasa do huhut ulaning mangalehon sagusagu, manang manjadihon juhut di bangsona i?

²¹Dibahen i dung dibege Jahowa, muruk ma Ibana, gabe marjimburjimbur ma api di Jakkob, marpiarpiar ma huhut rimas dompak Israel. [974†]

²²Ai ndang dihaporseai nasida Debata jala ndang diparhanalom hatuaonna i. [975†]

²³Hape lam didokkon Ibana do angka ombun di ginjang, jala diungkap angka pintu ni langit.

²⁴Jala diudanhon tu nasida Manna bahen sipanganon, jala dahanon sian banua ginjang dilehon tu nasida. [976†]

²⁵Sagusagu ni surusuruan do dipangan nasida be, maradu mahapan di bohal tinongosna i tu nasida.

²⁶Dipahehe do di langit alogo habinsaran, jala ditogutogu do alogo dangsina marhitehite gogona i. [977†]

²⁷Dung i diudanhon tu nasida juhut songon orbuk, jala pidong na marhabong songon horsik di laut. [978†]

²⁸Jala didekdekkon angka i tu tongatonga ni parsaroanna i, humaliang inganannasida i.

²⁹Jadi mangan ma nasida jala mahapan situtu; jala diparo tu nasida pinangidonasida i. [979†]

³⁰Ndang dope muli nasida sian pinangido ni rohanasida, ongom dope sipanganonnasida i di pamangannasida: [980†]

³¹Nunga marpiarpiar rimas ni Debata mida nasida, jadi dibunu ma angka na mokmok sian nasida, jala diragehon angka dolidoli ni Israel.

³²Luhutna pe songon i, sai didatdati nasida dope mardosa, jala ndang dihaporseai halongangan angka na binahenna i. [981†]

³³Dibahen i dipasalpu ma ariarinasida maralimos jala manungka do taonnasida i. [982†]

³⁴Molo Ibana mambunu nasida, jadi usouso ma nasida di Ibana, jala mulak nasida pasogothon mangalului Debata. [983†]

³⁵Jala diingot nasida, Debata do hape * partanobatoannasida i, jala Debata na tumimbul i sipaluanasida. [984†]

³⁶Dilesemlesem ma Ibana marhitehite pamangannasida, jala dilanasida i manggabusi Ibana.

³⁷Alai ndang marsihohot rohanasida tu Ibana, jala ndang dipasintong nasida padanna i. [985†]

³⁸Alai anggo Ibana, asi do rohana disesa do dosa, jala ndang disiaphon, jala jotjot do mulak rimasna i dibahen, jala ndang disunggul rimasna apala saluhut.

³⁹Sai diingot rohana do, sibuk do nasida, alogo na laho salpu, jala na so mulak. [986†]

⁴⁰Na sai jotjot Ibana dialo nasida di halongonan, jala diarsahi nasida Ibana di tangkaltangkal. [987†]

⁴¹Dung i diulahi nasida muse mangunjuni Debata, jala disarita Nabadia ni Israel.

⁴²Ndang diingot nasida tanganna i, nang ari, na pinaluana i nasida sian sipangarupa.

⁴³Uju pinatindangna i angka tandana di Misir, jala halongangan binahenna i di adaran Zoan. [988†]

⁴⁴Jala dipauba angka batang aeknasida i gabe mudar, ro di angka sungenasida, gabe ndang tarinum nasida be. [989†]

⁴⁵Ditongoshon tu tongatonganasida lanok angka na manganhon nasida, dohot tohuk angka na mangago nasida. [990†]

⁴⁶Tu tamponok do dilehon suansuanannasida i, jala na niulanasida i tu sihapor. [991†]

⁴⁷Mate do angka hau anggurnasida dibahen ambolas, ro di angka hau antajau. [992†]

⁴⁸Rage do dorbianasida dibahen ambolas, jala disoro porhas do parduaannasida i. [993†]

⁴⁹Dipalua do dompak nasida parpiarpiar ni rimasna i, piripiri, rimas dohot hagogotan, saparduan surusuruan ni angka parsorion.

⁵⁰Dipahornop do dalan ni rimasna i, ndang diolani hosanasida sian hamatean, jala dipasahat do ngolunasida i tu begu antuk.

⁵¹Jala diantuk do sude buhabaju di tano Misir, buhabaju ni * haroro ni gogonasida di angka undungundung ni si + Ham. [994†]

⁵²Dung i dipaborhat ma bangsona songon birubiru, jala diadu nasida songon parduaan di halongonan. [995†]

⁵³Jala tangkas do nasida diiringiring asa unang tarsonggot nasida, alai anggo musunasida i dihungkupi laut do. [996†]

⁵⁴Dung i dipatolhas ma nasida tu parbolatan ni habadiaonna i, tu * dolok on, na nionjar ni siamunna i. [997†]

⁵⁵Jala dipabali sian jolonasida angka parbegu i, jala didabu tu partaliannasida, jala angka marga ni Israel mangingani undungundungnasida i. [998†]

⁵⁶Hape diunjuni nasida do muse Debata na tumimbul i, jala dialo, jala ndang diingot nasida angka panindangionna i. [999†]

⁵⁷Jala * manginsurut nasida huhut manoisi, suang songon ompunasida i, marbalik ma nasida + songon sior sipaotooto. [1000†]

⁵⁸Jala digitihi Ibana marhitehite tambaknasida i, jala dipinggil Ibana marhitehite ganaganaannasida i. [1001†]

⁵⁹Jadi dung dibege Debata, tarrimas ma Ibana, gabe gialan situtu ma rohana mida Israel. [1002†]

⁶⁰Dung i diulang ma ingananna di Silo, undungundung na niingananna di tongatonga ni jolma. [1003†]

⁶¹Jala dipasahat * hagogoonna i tu habuangan, jala hamuliaonna poti parpadanan i tu tangan ni sipangarupa. [1004†]

⁶²Jala dipasahat bangsona i tu podang, ala tarrimas Ibana mida bangso na niainna i.

⁶³Dipangan api ma angka dolidolina i, jala ndang tarpuji be angka namarbajuna i. [1005†]

⁶⁴Marragean do * angka malimna i dibahen podang, jala + ndang mananangisi angka na mabaluna i. [1006†]

⁶⁵Jadi tarsunggul ma Tuhan i songon halak na modom songon ulubalang na marolopolop dibahen anggur.

⁶⁶Jala dipaundar angka musuna i, haurahon saleleng ni lelengna do dilehon tu nasida. [1007†]

⁶⁷Jala dibolongkon undungundung ni si Josep, jala ndang be dipillit marga Epraim. [1008†]

⁶⁸Marga Juda nama dipillit, dolok Sion na hinaholonganna i. [1009†]

⁶⁹Jala dipabuntul habadiaonna i sobokkon langit, songon tano on na pinaojakna i * salelenglelengna. [1010†]

⁷⁰Jala dipillit si Daud, naposona i, jala dibuat do ibana sian parmahanan birubiru. [1011†]

⁷¹Sian na mangadu birubiru panusuan ibana dialapi, asa parmahanonna Jakkob, bangsona i dohot Israel bangso na niainna i. [1012†]

⁷²Jadi diparmahan ma nasida hombar tu habonaron ni rohana i, jala ditogihon nasida marhitehite hapistaron ni angka tanganna. [1013†]