Read Batak Toba PSALMEN 88 Bible Online

PSALMEN 88 - Batak Toba bible

PSALMEN 88

¹Ende sipodaon sian si Heman, anak ni si Esra, taringot tu parsahiton ni angka na dangol.

²Ale Jahowa, Debata ni hatuaonku, sai joujou do ahu arian, sai di jolom do ahu bornginna i.

³Sai tolhas ma tu jolom tangiangki, sai paeleng ma pinggolmu tu angguhanggukki. [1098†]

⁴Ai nunga mandaon rohangki di angka hinamago, jala nunga pola dolos ngolungku tu banua toru. [1099†]

⁵Doshon angka na * manuruk tanoman nama ahu, songon baoa na so margellok. [1100†]

⁶Di tongatonga ni angka naung mate do podomanku, songon angka na rage tartullang marmodoman di tanoman, angka na so niingotmu be, jala naung tinostosan nasida sian tanganmu.

⁷Nunga dipeakkon Ho ahu tubagasan godung apala partoru, tubagasan angka haholomon, tubagasan angka lung.

⁸Sai didondoni murukmu do ahu, jala sude angka * galumbangmu diodothon Ho tu ahu. Sela! [1101†]

⁹Nunga * dipaholang Ho sian ahu angka alealengku, nunga dibahen Ho ahu hagigiannasida, tarhurung do ahu jala ndang tarbahen ahu haruar. [1102†]

¹⁰Pola do * lotop matangku binahen ni pardangolan, sai Ho do hupajoujou, ale Jahowa, manipat ari, sai hupaherbang, do tanganku tu Ho. [1103†]

¹¹Tung tagamon ma bahenonmu halongangan tu angka naung mate? Manang tagamon ma hehe angka halinu mamuji Ho? Sela! [1104†]

¹²Tung tagamon ma baritahononhon asi ni roham di bagasan tanoman, manang hasintonganmi di * banua toru? [1105†]

¹³Tung tagamon ma botoon halongangan binahenmu di bagasan haholomon, manang hatigoranmu di bagasan * tano parhalupaan? [1106†]

¹⁴Alai anggo ahu, ale Jahowa, sai tu Ho do ahu angguhangguk, gari sogot manogotna i nunga dijumpangkon tangiangki Ho. [1107†]

¹⁵Boasa ma tung tulakkononmu tondingki, ale Jahowa, tabunihononmu bohim sian ahu?

¹⁶Na dangol do ahu jala matemate sian sidakdanahon, sai hupataontaon angka parsorion binahenmu, gabe mandeledele ahu. [1108†]

¹⁷Nunga dibolus angka parpiarpiar ni murukmu ahu, nunga disiaphon angka sipasonggotmu ahu.

¹⁸Sai dihaliangi do ahu songon aek manipat ari, tung luhutna do mangonsongi ahu.

¹⁹Dipaholang Ho do sian ahu aleale dohot dongan magodang, gabe haholomon do angka na hutanda. [1109†]