Read Batak Toba PSALMEN 90 Bible Online

PSALMEN 90 - Batak Toba bible

PSALMEN 90

¹Tangiang sian si Musa, naposo ni Debata. I. [1] Ale Tuhan, sai Ho do haporusannami marsundutsundut!

²* Tagan so tubu dope angka dolok, jala tagan so adong dope ditubuhon tano on dohot portibi on, nunga adong hian Ho, ale Debata, sian salelenglelengna ro di salelenglelengna. [1150†]

³Sumuang do gabe orbuk jolma i dibahen Ho, dung i didok Ho muse: * Mulak ma hamu, ale jolma manisia! [1151†]

⁴Ai sobokkon sadari nantuari naung salpu do na saribu taon ianggo di jolom, jala songon sada gansi parjaga di borngin. [1152†]

⁵Diumbang Ho do nasida, jadi mate ma nasida, manogotna i nunga martumbur diulahi songon * duhutduhut. [1153†]

⁶Torang ari marbunga do i, jala martumbur, hape bodarina i disabi do jadi malos. [1154†]

⁷Ai siap do hami dibahen rimasmu, jala binahen ni parpiar ni murukmu, umbahen tompu mago hami. [1155†]

⁸Nunga dibahen Ho hajahatonnami tu jolom, dosanami angka na buni tu hatiuron ni bohim. [1156†]

⁹Ai lam moru do angka ariarinami sudena dibahen rimasmu, ai songon ho i sada do laho suda angka taonnami.

¹⁰Ariari ni taonnami, intap pitupulu taon do i, jala molo marhagogoon situtu dieak do ualupulu taon, jala hinadenggan nasida do * hangaluton dohot halojaon, ai hatop situtu do laho salpu, jala habang do hami. [1157†]

¹¹Tung ise ma tumanda gogo ni rimasmu, jala dihabiari Ho hombar tu pangonai ni rimasmu?

¹²Sai parroha i ma hami mamilangi angka ariarinami, asa dapotan roha na bisuk hami. [1158†] II.

¹³Sai marpangulahi ma roham, ale Jahowa! Tung sadia leleng on ma? Jala asi ma roham mida angka naposom.

¹⁴Disi torang ari pasabam ma rohanami marhitehite asi ni roham, asa marolopolop jala marlas ni roha hami di saluhut ariarinami. [1159†]

¹⁵Sai palas ma rohanami timbang ni angka ari hajimputonnami, timbang ni angka taon hinamago, na huida hami.

¹⁶Sai pataridahon ma tu angka naposom angka * pambahenanmu dohot hamuliaonmu tu angka pinomparnasida. [1160†]

¹⁷Sai songgop ma tu hita habasaron ni Jahowa Debatanta, sai * ditumpak Ibana ma pambahenan ni tanganta, olo tahe, sai ditumpak ma pambahenan ni tanganta i! [1161†]