Read Batak Toba PSALMEN 94 Bible Online

PSALMEN 94 - Batak Toba bible

PSALMEN 94

¹I. [1] Ale Debata Jahowa, * nampuna angka partubolon, ale Debata, nampuna angka partubolon, + marsinondang ma Ho! [1191†]

²Hehe ma Ho, ale * Panguhum ni tano on, paro ma + partubolon mangalo angka na ginjang roha. [1192†]

³Sadia leleng on angka parjahat i, ale Jahowa, sadia leleng on marolopolop angka parjahat i? [1193†]

⁴Sai marbullakbullak do nasida mangkatahon hajungkaton, sai teal do pangkuling ni sude angka siulahon hajahaton. [1194†]

⁵Sai diparsipal nasida do * bangsom, ale Jahowa, jala diruparupa parjambaranmu. [1195†]

⁶Marragean do na mabalu dohot na buro dibahen nasida, jala dibunui do angka na tading di lampin. [1196†]

⁷Dung i didok nasida: Ndang diida Jahowa, jala ndang marbinoto Debata ni si Jakkob. [1197†]

⁸Ua manimbang ma hamu, ale angka na oto ni bangso i, jala hamu, ale angka na bodo, sadihari pe marbisuk hamu? [1198†]

⁹Tung so marbinege ma Ibana Sisuan pinggol? Tung so marnida ma Sijadihon mata? [1199†]

¹⁰Ibana, na mangajar angka parbegu, tung so marlulu Ibana, Ibana do na mangajarhon parbinotoan tu manisia? [1200†]

¹¹Ditanda Jahowa do angka pingkiran ni manisia, ai alogo do angka nasida. [1201†] II.

¹²Martua ma baoa na pininsangmu, ale Jahowa, jala na pinodam marhite sian patikmu. [1202†]

¹³Asa dipasonang Ho ibana maradophon angka ari hinamago, paima sidung hinali godung tu parjahat i. [1203†]

¹⁴Ai ndang tagamon bolongkonon ni Jahowa anggo bangsona, manang tadingkononna parjambaranna. [1204†]

¹⁵Ai sai mulak tu hatigoran do uhum, jadi ihuthonon ni sude angka na tigor roha ma Ibana. [1205†]

¹⁶Tung ise ma donganku hehe mangalo angka parjahat i? Tung ise ma mangondihon ahu mangalo angka siulahon hajahaton?

¹⁷Aut sura unang Jahowa gabe pangurupion di ahu, na tung naung mangulon tondingku di * tano hasonangan. [1206†]

¹⁸Molo didok rohangku: * Tarsulandit ma pathu, jadi disande asi ni roham do ahu, ale Jahowa. [1207†]

¹⁹Di hinadeak ni holso ni rohangku di bagasan, sai dipasabam angka pangapoim do tondingku. [1208†]

²⁰Tung tagamon ma satahi Ho dohot * habangsa ni hamagoan, na pajadijadi halojaon tada tu patik hian? [1209†]

²¹Sai marluhut i do nasida tumahi tondi ni partigor, jala mudar * na so marpipot ditorui nasida. [1210†]

²²Alai Jahowa do gabe partanobatoan di ahu, jala Debatangku gabe dolok batu haporusanku.

²³Jala Ibana pasuang tu nasida hajahatonnasida i, jala siaphononna do nasida di bagasan hajahatonnasida i, siaphonon ni Jahowa Debatanta do nasida sogot.