Read Batak Toba PODA SIAN RAJA SALOMO 10 Bible Online

PODA SIAN RAJA SALOMO 10 - Batak Toba bible

PODA SIAN RAJA SALOMO 10

¹Anak na pistar palas roha ni amana, alai anggo anak na bodo arsak ni roha ni inana. [119†]

²Ndang marguna angka arta hajahaton, alai anggo hatigoran paluahon sian hamatean. [120†]

³Ndang tagamon * haraparon tondi ni partigor loason ni Jahowa, alai anggo hisap ni angka parjahat, disundati do. [121†]

⁴Marpogospogos ma manang ise na langgus mulaulaon, alai anggo tangan ni angka na padot parohon hamoraon. [122†]

⁵Manang ise na papungupunguhon di partaonan logo ni ari, i ma anak na marroha; alai manang ise na redem di hamamasa ni gotilon, i ma anak jea.

⁶Angka pasupasu do songgop tu ulu ni partigor; alai anggo pamangan ni halak parjahat hungkupan ni haurahon do.

⁷Parningotan ni partigor mangkorhon pasupasu, alai anggo * barita ni halak parjahat, sai na busuk do. [123†]

⁸Parroha na bisuk manjalo pangajaran, alai anggo pardila na oto sai na pidom do.

⁹Manang ise ma marpangalahohon hadaulaton, sai na marsihohot di dalanna, alai manang ise na pageduk dalanna botoon ni halak do i.

¹⁰Manang ise na * mangkidophidopi mambahen hajepolon; jala pardila na oto, sai na pidom do. [124†]

¹¹Mual ni hangoluan do ianggo pamangan ni partigor; alai anggo pamangan ni halak parjahat hungkupan ni haurahon do. [125†]

¹²Hosom pahehe parbadaan, alai * saluhutna hasalaan di hungkupi roha holongi do. [126†]

¹³Di bibir ni halak na marroha i jumpang halak habisuhon, alai matua hotang tama tu tanggurung ni na hurang roha.

¹⁴Ia halak na bisuk marhohomhon parbinotoan, alai anggo pamangan ni na oto manahopi hamagoan.

¹⁵Artana i do huta na gonting di roha ni na mora, alai hapipidom ni angka na parir do hapogosonnasida i. [127†]

¹⁶Na niula ni partigor gabe hangoluan, alai anggo na niomo ni * parjahat gabe dosa do. [128†]

¹⁷Mardalan di * lapang tu hangoluan do manang ise na mangaramoti pangajaran, alai manang ise na manjua pinsangpinsang, na mangaliluhon do. [129†]

¹⁸Manang ise na mananom roha hosom, pardila sipaotooto do i; alai manang ise na pararat pangkataon tundal, halak na oto do i.

¹⁹Di bagasan hinadeak ni hatahata, ndang holang adong sala; alai manang ise na mangkongkangi bibirna, i ma na marroha. [130†]

²⁰Tudoshon perak na pita do dila ni partigor, alai anggo roha ni halak parjahat, ndang hanopan.

²¹Bibir ni partigor marmahan torop halak, alai anggo halak na oto i haotoon ni rohana do di hamatehon.

²²Pasupasu ni Jahowa do mambahen mamora, jala ndang mardongan hangaluton dibahen. [131†]

²³Hira meammeam do di roha ni na oto mangulahon getegete, suang songon i do halak parhapistaran mangulahon habisuhon. [132†]

²⁴Na * hinabiaran ni parjahat, i do songgop tu ibana, alai + pinangido ni roha ni partigor dilehon Jahowa do. [133†]

²⁵Songon pamolus ni habahaba, tompuna pesan parjahat i, alai anggo partigor i, hot do ro di salelenglelengna.

²⁶Songon pangkorhon ni na asom tu ipon, jala songon timus tu mata, songon i do sigurbak ulu tu na marsuru ibana.

²⁷Biar mida Jahowa mangudut ariari, alai jempek do anggo angka taon ni parjahat. [134†]

²⁸* Arop ni roha ni halak partigor manjadi las ni roha, alai tarhirim do ianggo + halak parjahat i di na niaropna. [135†]

²⁹Partanobatoan do di halak na daulat roha dalan ni Jahowa, alai hamagoan do ianggo di halak siulahon hajahaton. [136†]

³⁰Ndang tarhutik * partigor i ro di saleleng ni lelengna, alai anggo + parjahat i, ndang maringan di tano on. [137†]

³¹Pamangan ni partigor martumburhon hapistaran, alai anggo dila ni panggetegete ginsiron do. [138†]

³²Angka bibir ni partigor umboto na patut dohononna, alai anggo pamangan ni halak parjahat getegete sambing do dihatahon.