Read Batak Toba PODA SIAN RAJA SALOMO 11 Bible Online

PODA SIAN RAJA SALOMO 11 - Batak Toba bible

PODA SIAN RAJA SALOMO 11

¹Hatian na marpangansi do na hinabiashon ni Jahowa, alai batu an na gok do lomo ni rohana. [139†]

²Ia ro hajungkaton, ro ma dohot haurahon: Alai jumpang do hapistaran di halak na serep marroha. [140†]

³Hadaulaton ni halak partigor manogihon nasida, alai ansiansi ni halak pangoseose mangago nasida sandiri. [141†]

⁴Ndang marguna hamoraon uju di ari pangarimasan, alai anggo hatigoran paluahon sian hamatean. [142†]

⁵Hatigoran ni na daulat roha patigor dalanna, alai tinggang do anggo parjahat i, binahen ni hajahatonna.

⁶Hatigoran ni angka partigor paluahon nasida, alai tarjorgong do anggo halak pangoseose, binahen ni hisapna sandiri. [143†]

⁷Molo mate jolma parjahat i, mate do dohot arop ni rohana, jala pangkirimon marhite sian hajahaton mago do. [144†]

⁸Malua do halak partigor sian hagogotan, parjahat i do soluk singkatna tusi. [145†]

⁹Marhitehite pamangan ni pangansi mago donganna dibahen, alai marhitehite parbinotoan ni halak partigor malua nasida.

¹⁰Marolopolop do isi ni sada huta mida hadoharon ni halak partigor, jala ia mago halak parjahat masa suraksurak.

¹¹Marhitehite pasupasu ni halak partigor, gabe timbul huta, alai marhitehite pamangan ni halak parjahat maloha do huta i. [146†]

¹²Manang ise na paro lea di donganna, i ma na so marroha, alai anggo baoa na pantas marroha hohom do.

¹³Manang ise na mangalap manaruhon hata, i ma manjehehon hahomion; alai anggo partondi na marsihohot mangkuphupi hatahata.

¹⁴Molo soada ruhut harentaon, peut ma na sabangso i, alai hatuaon do i, molo torop panuturi. [147†]

¹⁵Tung na marjea situtu do manang ise na girgir mangkangkungi halak sileban, alai manang ise na mangkasogohon pangkangkungion, na marsijamaan tangan, i ma na sonang. [148†]

¹⁶Inaina na basar marsihohot do maniopi hamuliaon, tudos tu halak siulahon gogo mangahuti hamoraon.

¹⁷Mambahen na denggan tu dirina do baoa na basa, alai pasusa sibukna sandiri do halak na garang roha.

¹⁸Marpangomoan sipaotooto do halak parjahat; alai manang ise na manaburhon hatigoran, maruli upa haburjuon do. [149†]

¹⁹Manang ise na marsihohot di hatigoran, sahat do tu hangoluan; alai manang ise na mangeahi hajahaton, patibu hamamatena. [150†]

²⁰Marbiasbias do roha ni Jahowa mida halak parroha na geduk, alai lomo ni rohana do halak na daulat marpangalaho.

²¹Sian sundut tu sundut, tung na so tarbahen lias do parjahat i; alai anggo pinompar ni halak partigor malua do.

²²Songon harihir sere di bagasan igung ni babi, suman tusi do parompuan na uli na tumundalhon hatomanon. [151†]

²³Pangidoan ni halak partigor denggan sambing do, alai anggo arop ni roha ni halak parjahat, mangalap torutoru situtu do. [152†]

²⁴Adong deba halak na buas manaburhon, hape lam ganda do, adong huhut deba mangkolit hamoraonna, hape lam marpogospogos do.

²⁵Halak pardenggan basa mokmohan do, jala lam lobian manang ise na mardenggan basa. [153†]

²⁶Manang ise na manongkik arga ni emena, buraan ni halak ma ibana, alai maruli pasupasu do ulu ni panggadis.

²⁷Manang ise na manjugulhon na denggan, mangalului lomo ni Debata, alai manang ise na manjalahi hajahaton, sai na manginona tu ibana sandiri do. [154†]

²⁸Manang ise na marhaposan tu hamoraonna, sai na tinggang do ibana, alai martumbur do songon bulung anggo halak partigor i. [155†]

²⁹Manang ise na mangarapari isi ni bagasna, teanonna ma alogo, jala gabe naposo ni na pistar roha do halak na oto i.

³⁰Parbue ni partigor do * hau hangoluan, jala manang ise na malo sumambut roha ni halak, na pistar do i. [156†]

³¹Ida ma, gari halak partigor maruli pamaloson di tano on, lam halak parjahat ma dohot pardosa. [157†]