Read Batak Toba PODA SIAN RAJA SALOMO 14 Bible Online

PODA SIAN RAJA SALOMO 14 - Batak Toba bible

PODA SIAN RAJA SALOMO 14

¹Hapistaran ni angka parompuan pajongjong jabuna, alai anggo na oto, laos tanganna sandiri mangalohaisa. [192†]

²Manang ise na marpangalahohon hatigoranna mabiar do mida Jahowa, alai anggo halak na pageduk dalanna, palea Ibana do.

³Di bagasan pamangan ni halak na oto do linsinglinsing ni jungkatna; alai anggo bibir ni halak na pistar mangaramoti nasida.

⁴Molo so adong horbo paninggala, rumar ma sopo; alai godang parsaulian dapot sian gogo ni horbo.

⁵Sitindangi haposan, ndang olo margabus, alai mangkusiphon gabus do anggo halak sitindangkon sipaotooto. [193†]

⁶Mangalului hapistaran do halak pangarehe, hape ndang jumpangsa; alai muda do dapot halak na marroha i parbinotoan.

⁷Paholang ma ho sian baoa na oto, ndang tagamon dapot ho bibir na marparbinotoan di ibana.

⁸Hapistaran ni na bisuk do i: Ditimbang do dalanna, alai anggo haotoon ni halak na oto panginsu do i.

⁹Tung na so marguna do pelean parsalaan di halak na oto, alai anggo di tongatonga ni halak partigor do hasortaon.

¹⁰Roha i do tumanda arsak ni rohana sandiri, las ni rohana pe, ndang dapot hilalaon ni halak sileban.

¹¹* Bagas ni halak parjahat siap do, alai anggo + undungundung ni halak partigor martumbur do. [194†]

¹²Adong do sada dalan, tigor do i di roha ni jolma, hape anggo ujungna gabe dalan tu hamatean do. [195†]

¹³Nang di bagasan parengkelon, tupa do marsak roha, jala ujung ni las ni roha sisongon i hajepolon do.

¹⁴Mahap binahen ni dalanna do parroha na marbalik i, alai dihasabamhon baoa na denggan roha i do na di ibana. [196†]

¹⁵Halak na oto marhatutuhon luhut hatahata, alai anggo halak na bisuk i, ditimbang do langkalangkana.

¹⁶Mabiar do ia jolma na pistar, gabe sumurut ibana sian hajahaton, alai anggo halak na oto patealteal hatahatana huhut pedem.

¹⁷Halak parpiripiri mangulahon haotoon, jala baoa panggetegete dihagigihon halak do.

¹⁸Halak na oto martohap haotoon, alai * martumpalhon parbinotoan do ianggo halak na bisuk. [197†]

¹⁹Marsomba do sogot halak parjahat di jolo ni halak na denggan roha, jala halak na jungkat di lambung pintu ni partigor.

²⁰Molo dung * pogos, peus nang alealena mida ibana, alai torop do aleale ni halak na mora. [198†]

²¹Manang ise na lea roha mida alealena, pardosa do i; alai manang ise na asi roha mida na dangol, * martua do. [199†]

²²Tung so lilu ma halak angka na marsangkap hajahaton? Tung so dapotan asi ni roha dohot haburjuon ma halak na marsangkap na denggan?

²³Sai mardongan parsaulian do nasa hangaluton, alai anggo hata teal mambahen hurangan halak. [200†]

²⁴Tumpal ni halak na pistar do hamoraonnasida, alai haotoon do anggo tengatenga ni halak na oto.

²⁵Siondingi hosa do halak sitindangkon hasintongan, alai anggo halak sitindangkon gabus mangagohon do. [201†]

²⁶Biar mida Jahowa do partanobatoan na togu, laos gabe haporusan di angka anakna do Ibana. [202†]

²⁷Biar mida Jahowa do mual hangoluan, asa mandao angka jorgong ni hamatean. [203†]

²⁸Hinatorop ni na nirajaan do hamuliaon ni raja, alai oruoru ni na nirajaan do hapipidom ni pangarajai.

²⁹Halak na lambat tarrimas do sigodang panimbangon, alai halak parpiripiri pagodang haotoon. [204†]

³⁰Ngolu tu pamatang do roha halambohon, alai * manggagat tu holiholi do anggo roha pangiburuon. [205†]

³¹Manang ise na * mangarupa halak na parir, mangaleai Sitompa ibana do; alai + manang ise na pasangap Ibana, asi do rohana mida na pogos. [206†]

³²Binahen ni hajahatonna pupur parjahat i, alai nalom do roha ni partigor nang di hamamatena.

³³Di bagasan roha ni halak na pistar do tongon mangulon hapistaran, alai sai tartanda do i di tongatonga ni halak na oto. [207†]

³⁴Habonaron do patimbul sada bangso, alai haurahon ni angka bangso do ianggo dosa i.

³⁵Lomo do roha ni raja mida * naposo na pantas marroha, alai hona rimasna do ianggo sibahen haurahon. [208†]