Read Batak Toba PODA SIAN RAJA SALOMO 15 Bible Online

PODA SIAN RAJA SALOMO 15 - Batak Toba bible

PODA SIAN RAJA SALOMO 15

¹Alus na lambok paombun rimas, alai anggo hata na horas mambahen marsijongjong ateate. [209†]

²Dila ni halak na pistar paholpu parbinotoan, alai anggo pamangan ni * halak na oto marbullakbullakkon haotoon. [210†]

³Manatap manonggor do mata ni Jahowa tu liat portibi on, marnida halak na jahat dohot na denggan marroha. [211†]

⁴Dila halambohon do sada hau hangoluan, alai anggo ansiansi marhite sian i, hasedaon ni roha di bagasan do i. [212†]

⁵Halak na oto mangkasogohon pangajaran ni amana, alai jolma na bisuk do manang ise na marateatehon pinsangpinsang. [213†]

⁶Di bagasan jabu ni halak partigor do godang arta, alai parohon hagaoron do anggo parsaulian tu parjahat.

⁷Pamangan ni halak na pistar manaburhon parbinotoan, ndang songon i anggo roha ni halak na oto.

⁸Marbiasbias do roha ni Jahowa mida pelean ni halak parjahat, alai anggo tangiang ni halak partigor lomo ni rohana do i. [214†]

⁹Marbiasbias do roha ni Jahowa mida dalan ni parjahat alai dihaholongi rohana do manang ise na mareakkon hatigoran. [215†]

¹⁰Pangajaran na posi do mangonai tu manang ise na tumadingkon dalan hatigoran; ingkon mate do halak na mangkagigihon pinsangpinsang. [216†]

¹¹Gari * parbeguan dohot banua toru sahali patar do di jolo ni Jahowa, lam angka roha ni jolma manisia ma. [217†]

¹²Ndang lomo roha ni pangarehe hona pinsang ibana, ndang laho ibana tumopot halak na pistar. [218†]

¹³Roha na hilas pasihar panaili, alai molo marsak roha margudompong ma tondi. [219†]

¹⁴Roha na pantas mangalului parbinotoan, alai anggo bohi ni halak na oto lilian mida haotoon.

¹⁵Luhut ariari ni na parir jahat do di rohana, alai anggo roha na hilas i hira marharoan tongtong. [220†]

¹⁶Tagonan na otik mardongan biar mida Jahowa, asa arta godang mardongan hasusaan. [221†]

¹⁷Tagonan ingkau rata mardongan holong ni roha, sian lombu na pinamokmok mardongan pangiburuon. [222†]

¹⁸Baoa parpiripiri pahehe parbadaan, alai anggo halak na lambat tarrimas mangintopi pargulutan. [223†]

¹⁹Tudos do * dalan ni sigurbak ulu tu handang sian bulu duri, alai manaletes do anggo lapang ni halak partigor. [224†]

²⁰Anak na pistar palas roha ni amana, alai jolma na oto sahali do manang ise na palea inana. [225†]

²¹Haotoon do apala las ni roha ni halak na hurang roha, alai anggo halak na pantas marroha pabulus pangalahona. [226†]

²²Sai na tarselak do angka sangkap molo soada tuptupan, alai molo torop panuturi, sai tulus ma. [227†]

²³Dapotan las ni roha baoa marhite sian paraluson ni pamanganna, jala hata sisandok pe di tingki halehetanna, mansai denggan do.

²⁴Lapang hangoluan manuju dompak ginjang do di halak na pantas marroha, asa dipaholang dirina sian dalan na tuat tu banuatoru.

²⁵Siap do bagas ni halak na jungkat bahenon ni Jahowa, alai hot do ianggo talutuk ni boruboru na mabalu dihajongjongkon. [228†]

²⁶Marbiasbias di roha ni Jahowa mida sangkapsangkap angka na roa; alai pita do di jolona angka pangkataion sian holong ni roha. [229†]

²⁷Laos manggaori bagasna sandiri do manang ise na mangadangi pangomoan na so turut, alai sai mangolu ma halak na mangkasogohon sisip. [230†]

²⁸Marhusari do jolo roha ni halak partigor taringot tu alusna, alai anggo pamangan ni halak parjahat marbullakbullakkon hajahaton.

²⁹Holang do Jahowa sian halak parjahat, alai ditangihon do anggo tangiang ni halak partigor. [231†]

³⁰Sihar ni panaili palashon roha, * barita na denggan mambahen marmiak holiholi. [232†]

³¹Pinggol na tumangihon pinsangpinsang hangoluan, mian do di tongatonga ni halak na pistar.

³²Manang ise na manjua pangajaran, palea rohana sandiri do, alai manang ise na tumangihon pinsangpinsang dapotan roha ma. [233†]

³³* Biar mida Jahowa do pangajaran tu hapistaran, jala haserepon do + patujolo ni hamuliaon. [234†]