Read Batak Toba PODA SIAN RAJA SALOMO 16 Bible Online

PODA SIAN RAJA SALOMO 16 - Batak Toba bible

PODA SIAN RAJA SALOMO 16

¹Lan do sangkap ni roha ni jolma, alai sian Jahowa do anggo paraluson ni pamangan. [235†]

²Saluhut dalan ni baoa pita do di rohana, alai Jahowa do mangantan angka tondi. [236†]

³Tu Jahowa ma giling angka pambahenanmu, asa tulus angka sangkap ni roham. [237†]

⁴Luhut do dijadihon Jahowa hombar tu na tinembak ni rohana, nang halak parjahat tu ari hamagoan. [238†]

⁵* Marbiasbias do roha ni Jahowa mida sude jolma na ginjang marroha; + sian sundut tu sundut: Ndang tagamon lias ibana. [239†]

⁶Marhite sian asi ni roha dohot habonaron salese hajahaton, jala marhite sian biar mida Jahowa mandao iba sian hajahaton.

⁷Molo lomo roha ni Jahowa mida dalan ni baoa, padameonna tu ibana nang angka musuna. [240†]

⁸Tagonan do na otik marhitehite hatigoran, asa parsaulian godang sian dalan na so turut. [241†]

⁹Roha ni jolma marsangkap dalanna, alai Jahowa do patontu langkana. [242†]

¹⁰Ulpuhan sian Debata di bagasan pamangan ni raja, jadi ndang manjahati pamanganna di paruhuman.

¹¹Jahowa do nampuna hatian dohot bulung ni dasing hasintongan, jadijadianna do saluhut batu timbangan di bagasan hadanghadangan. [243†]

¹²Marbiasbias do tama roha ni angka raja mangulahon hajahaton, ai * marhite sian hatigoran do hot habangsana. [244†]

¹³Bibir hatigoran i do lomo ni angka raja, jala dihaholongi rohana do halak sidok hata sintong.

¹⁴Rimas ni raja do hira angka suruan hamatean, alai anggo halak na pistar paombun rohana. [245†]

¹⁵Di bagasan sihar ni panaili ni raja do hangoluan, jala tudoshon ombun di partaonan logo ni ari habasaon ni rohana. [246†]

¹⁶Andul do dumenggan mangomo hapistaran asa sere, jala tagonan do mangomo roha hapantason asa perak. [247†]

¹⁷Dalan ni halak partigor mandao do sian hajahaton, marhamaol hosana sandiri do manang ise na mangaramoti dalanna.

¹⁸Matua ginjang ni roha do patujolo ni hajepolon, jala hatimboon diri patujolo ni hatinggangon. [248†]

¹⁹Tagonan do serep martondi rap dohot halak na dangol, asa marbagi tabantaban rap dohot na jungkat.

²⁰Manang ise na marateatehon hata ni Debata, jumpangan na denggan, jala halak na marhaposan tu Jahowa maruli tua. [249†]

²¹Halak na pistar marroha targoar na pantas, jala halambohon ni bibir manambai poda. [250†]

²²Mual hangoluan do * roha hapantason di nampunasa, alai anggo pangajaran ni halak na oto haotoon sambing do. [251†]

²³Roha ni na pistar papantas pamanganna, jala ditambai poda di atas dilana.

²⁴Tudoshon situak ni loba do pangkataion halambohon, tonggi tu roha, jala hahisaron tu holiholi. [252†]

²⁵Adong do sada dalan, tigor di roha ni baoa, hape marhapatean tu hamatean do ujungna. [253†]

²⁶Roha ni halak na ngalutan manambai hangalutan tu ibana, ai pamanganna patungki ibana. [254†]

²⁷Baoa parjahat sahali mambungbungi hajahaton, jala songon api na marsigorgor do di atas ni bibirna.

²⁸Baoa panggetegete patubi parbadaan, jala parhusiphusip pabolabola halak na maraleale. [255†]

²⁹Baoa pangarupa mangela alealena, jala ditogihon ibana tu dalan hamagoan. [256†]

³⁰Mangkidophidopi ia matana laho umpingkir getegete, dipahuntamhuntam bibirna naeng mangulahon hajahaton. [257†]

³¹Tumpal hamuliaon do uban na jumpang marhite sian dalan hatigoran. [258†]

³²Tagonan do halak na lambat tarrimas sian ulubalang, jala halak na mangarajai dirina, umbalga do i sian na papatu huta. [259†]

³³Tu bagasan ampuan tardanggur rujiruji, alai saguru di Jahowa do haputusanna.