Read Batak Toba PODA SIAN RAJA SALOMO 18 Bible Online

PODA SIAN RAJA SALOMO 18 - Batak Toba bible

PODA SIAN RAJA SALOMO 18

¹Mangolooloi pinangido ni rohana sandiri do manang ise na papulik dirina, saluhut roha hapantason do na nialona.

²Ndang lomo roha ni halak na oto mida roha hapantason, sai naeng botoon ni halak sibunian ni rohana.

³Molo ro hajahaton, ro ma dohot haleaon, jala mangihut tu haurahon do elakelak.

⁴Aek angka na bagas do hata sian pamangan ni baoa, jala sunge na doras mardalan do mual ni hapistaran.

⁵Ndang jadi dingkan an halak parjahat i, ala mida sangap, manang pataluhon partigor di paruhuman. [276†]

⁶Bibir ni halak na oto girgir maniroi parsalisian, jala pamanganna pajuju marsilombutan. [277†]

⁷Pamangan ni halak na oto mambahen hamagoanna sandiri, jala bibirna gabe jorgong tu rohana. [278†]

⁸Hatahata ni pangasung i, hira hata pargaiton, hape torus do angka bilut ni pusupusu ditondong. [279†]

⁹Nang halak na marlanggelangge di ulaonna, anggi ni pargadombus do ibana. [280†]

¹⁰Partanobatoan na togu do Goar ni Jahowa, marhaporusan tusi do partigor i, gabe timbul do. [281†]

¹¹Sinamotna do huta na gonting anggo di roha ni na mora, jala tudoshon parik na timbo disura rohana. [282†]

¹²Jolo * dipaginjang jolma i do rohana, asa ro hamagoan, matua haserepon do anggo + patujolo ni hamuliaon. [283†]

¹³Manang ise na mangulak hata, so jolo sahat ditangihon, otona do i, jala parohon haurahon.

¹⁴Baoa partondi na pir manaon, i ma paneang parsahitonna, alai anggo partondi na gondok, tung ise ma manganjusa? [284†]

¹⁵Roha na pantas mangomo parbinotoan, jala pinggol ni halak na pistar manjalahi parbinotoan.

¹⁶Silehonlehon ni jolma palumbang langkalangkana, jala i do manogihon ibana tu jolo ni halak na balga. [285†]

¹⁷Halak parjolo mangaluhon badana parpintor di rohana, hape ro ma muse alona padapot ibana.

¹⁸Rujiruji * pasohot angka parsalisian, jala mambahen tolatola tu halak angka na gogo. [286†]

¹⁹Haha manang anggi na niosean, ummendel do i sian huta na gonting, jala tudoshon ransangransang ni bagas na bolon do angka parsalisian.

²⁰Ingkon sian parbue ni pamanganna pabutongon ni baoa butuhana, jala sian pinarbuehon ni bibirna sabam rohana. [287†]

²¹Hamatean dohot hangoluan marpandapotan do tu dila, jala manang ise na mangaradotisa panganonna do parbuena. [288†]

²²Manang ise naung jumpangan soripada, dapotan tua, jala maruli habasaon sian Jahowa. [289†]

²³Marhurajai na pogos i mandok suara, alai kasar do ianggo na mora i maralus.

²⁴Baoa parpedan na torop parohon hasusaan tu ibana sandiri; alai anggo aleale situtu marsilohotan do i sian hahaanggi. [290†]