Read Batak Toba PODA SIAN RAJA SALOMO 19 Bible Online

PODA SIAN RAJA SALOMO 19 - Batak Toba bible

PODA SIAN RAJA SALOMO 19

¹Tagonan do halak na pogos, na marpangalahohon hadaulatonna sian halak pardila getegete, hape na oto do ibana. [291†]

²Nang roha na so marparbinotoan, ndang denggan, jala manang ise na bojok marpangalaho, sai na mardosa do.

³Haotoon ni jolma sandiri mangago dalanna, hape dompak Jahowa do marmungutmungut rohana. [292†]

⁴Hamoraon do patorop aleale, alai anggo halak na parir, gari alealena tumadingkon ibana. [293†]

⁵Ndang tagamon lias sian uhum halak sitindangi pargapgap, jala ndang tagamon malua manang ise na mangkatahon gabus. [294†]

⁶Torop halak papujipuji halak na sangap, jala luhut halak maralealehon baoa pardengganbasa.

⁷Luhut hahaanggi ni na pogos mangkagigihon ibana, lam alealena ma tung so mandao sian ibana; manang ise na mangulasulas hata ndang marlaba. [295†]

⁸Manang ise na manuhor roha hapantason, mangkaholongi hosana, manang ise na mangaradoti parbinotoan, dapotan tua.

⁹Halak sitindangi pargapgap, ndang tagamon lias sian uhum, jala mago do halak na mangkatahon gapgap. [296†]

¹⁰Ndang tama sampe hadoharon tu halak na oto, lam anak somang ma tama gumomgom indukna. [297†]

¹¹Roha habibiton ni jolma palambat ibana tarrimas, jala hamuliaonna do i umbolus hasalaan.

¹²Tudoshon pangorong ni babiat do piripiri ni raja, alai songon nambur tu duhutduhut do anggo habasaronna. [298†]

¹³Mardapotdapot do jea dibahen * anak na oto tu amana, jala songon + panirisan ni udan nene do badabada ni ina. [299†]

¹⁴Jabu dohot sinamot do teanteanan sian ama, alai sian Jahowa do anggo pardihuta na pantas marroha. [300†]

¹⁵Halosohon mambahen tarnenep modom, jala roha na marlanggelangge, ingkon rapar do. [301†]

¹⁶Manang ise na marateatehon tona, mangaramoti hosana do, alai sai na mate do manang ise na neang marpangalaho. [302†]

¹⁷Na pasali Jahowa do manang ise na mardenggan basa tu na pogos, jala Ibana mamaloshon denggan basana i tu ibana. [303†]

¹⁸Sai ajar ma anakmi, ai tarparbaga dope muba rohana; alai unang tubu roham naeng mambunu hosana. [304†]

¹⁹Halak parpiripiri bolon mambahen siaeonna; alai molo tung dipalua ho ibana sai lam tu tambana dope pangajaran.

²⁰Sai tangihon ma hata sipaingot jala jangkon pangajaran, asa gabe pistar ho di hasusuda ni bohalmu.

²¹Pasimpar do sangkapsangkap di bagasan roha ni baoa, alai sangkap ni Jahowa do na marsihohot. [305†]

²²Pinangido ni roha ni jolma do habasaronna, jala tagonan do halak na pogos sian baoa pargapgap.

²³Biar mida Jahowa parohon hangoluan, jala halak na sabam roha marsonangsonang do, ndang manginona jea tu ibana. [306†]

²⁴Dipohul halak sigurbak ulu do nian indahanna, gari mambahen tu pamanganna ro losokna. [307†]

²⁵Mangonai tangan ma ho tu halak pangelesi, asa anggiat marbisuk halak na oto, sai ajar ma halak na pantas marroha, asa tamba parbinotoannai. [308†]

²⁶Manang ise na mangarupa amana, tung pola dipalaholaho inana, i ma halak sibahen haleaon dohot haurahon.

²⁷Ale anaha, molo dipasadi ho tumangihon pangajaran, jadi lilu ma ho sian angka hata parbinotoan. [309†]

²⁸Halak sitindangi parroha na jat palea uhum, jala pamangan ni halak parjahat mamolgak hageduhon.

²⁹Naung pinadiri hian torutoru di halak pangarehe, jala lipatlipat tu tanggurung ni halak na oto. [310†]