Read Batak Toba PODA SIAN RAJA SALOMO 20 Bible Online

PODA SIAN RAJA SALOMO 20 - Batak Toba bible

PODA SIAN RAJA SALOMO 20

¹Pangapasi do anggur i, jala sibahen hagunturon tuak na pang, nasa na lilu tu bagasan ni, ndang tagamon marbisuk ibana. [311†]

²Tudoshon parauangon ni babiat do asupasup ni raja, manang ise na manggitik ibana, mardosa tu hosana sandiri do. [312†]

³Hamuliaon ni baoa do i molo mandao ibana sian bada, alai manang ise na girgir manean bada halak na oto do i.

⁴Binahen ni biar mida ngali ni ari ndang maninggala sigurbak ulu, jadi manohunohu ibana di hamamasa ni gotilon, hape ndang adong jumpangsa. [313†]

⁵Tudoshon aek angka na bagas do sangkap ni roha ni baoa di bagasan, alai anggo baoa na bistok dapotsa do sulingkitonna. [314†]

⁶Lan jolma mangusaphon denggan basana sandiri, alai anggo baoa haposan, tung mahal do jumpang manang ise.

⁷Halak na marpangalahohon hadaulatonna, i ma partigor, martua ma angka anakna dung mate ibana. [315†]

⁸Raja na juguk di habangsa paruhuman, mamurpurhon nasa na jat marhitehite matana sandiri. [316†]

⁹Tung ise ma na hum mandok: Nunga tung huurasi rohangki, nunga tung ias ahu sian dosangku? [317†]

¹⁰Mardua hatian jala mardua solup, rap hagigian ni Jahowa do duansa. [318†]

¹¹Nang dakdanak tartanda do marhite sian angka parulaonna, manang na toman, manang na tigor ulaonna. [319†]

¹²Pinggol na tinggil marbinege, dohot mata na torang marnida, Jahowa do jumadihon duansa. [320†]

¹³Unang halomohon na modommodom, asa unang gabe pogos ho, pabidok matam, asa butongan sipanganon ho. [321†]

¹⁴Na roa do, na roa do! Ninna halak panuhor, alai ia dung tundal ibana, dipapujipuji ma dirina.

¹⁵Adong do nian sere dohot torop angka humala: Alai ulaula apala na arga sahali do angka bibir parbinotoan. [322†]

¹⁶Buat hian ma ulosna, ai halak sileban do na hinangkunganna, jala pangido ma singkoram sian ibana ala ni halak ruar. [323†]

¹⁷Tabo do didai baoa roti sipaotooto, hape gok batu garaga pamanganna ia di ujung. [324†]

¹⁸Marsihohot do angka sangkap binahen ni tuptupan, jala mardongan partogion na pantas ulahon hamusuon. [325†]

¹⁹Manang ise sialap manaruhon hata, i ma na manjehehon hahomion; jala unang angkupangkupi halak sijubajabi. [326†]

²⁰Manang ise na mamburai amana dohot inana, ingkon mintop palitona di na holom marimpotimpot. [327†]

²¹Teanteanan na nilahutan di mulana, ndang parsaulihononhon di ujungna. [328†]

²²Unang dok: Ingkon marbalos bahenonku na jati! Marhaposan tu Jahowa ma ho tagonan, asa Ibana manumpak ho. [329†]

²³Hagigian ni Jahowa do na mardua batu timbangan, jala tung na roa sahali do dasing panginsu. [330†]

²⁴Marharoroan sian Jahowa do langkalangka ni baoa, tung ise ma jolma na mangantusi dalanna sandiri? [331†]

²⁵Manjadi jorgong do di jolma, molo marneang ni roha ibana mangehet na badia i; jala dung sor angka bagabagana naeng dope diordioronna alus. [332†]

²⁶Raja na pantas marroha mangkiaphon halak parjahat, jala dibolushon di atas nasida roda pardegean. [333†]

²⁷Palito ni Jahowa do tondi ni jolma, na manulingkit sude bilut ni pusupusu. [334†]

²⁸Habasaron dohot habonaron mangaramoti raja, jala hot habangsana marhitehite roha haholongon. [335†]

²⁹Tumpal ni angka dolidoli do gogo nasida, jala * hamuliaon ni halak na tuatua do uban. [336†]

³⁰Pangalilitan ni bugang do manjadi pangurasan sian na jat dohot libaslibas angka na masuk tu bagasan angka bilut ni pusupusu.