Read Batak Toba PODA SIAN RAJA SALOMO 21 Bible Online

PODA SIAN RAJA SALOMO 21 - Batak Toba bible

PODA SIAN RAJA SALOMO 21

¹Tudoshon aek ni angka sunge do roha ni raja di bagasan tangan ni Jahowa, tung tu sandok lomo ni rohana do * ditogutogu. [337†]

²Saluhut dalan ni baoa tigor do di rohana sandiri, alai Jahowa do mangantan angka roha. [338†]

³Lomoan do roha ni Jahowa mida na mangulahon hatigoran dohot uhum, asa mida pelean. [339†]

⁴Mata haginjangon dohot roha hajungkaton dohot tiur ni parnidaan ni halak parjahat, dosa sambing do i. [340†]

⁵* Sangkapsangkap ni halak na padot manjadihon hadumaon situtu, alai anggo halak na hojok, ingkon haraparon do. [341†]

⁶Manang ise na papunguhon arta marhite sian dila sipaotooto, ombun sambing do i di halak na mangalului hamatean. [342†]

⁷Pangarupaon ni halak parjahat manggagat tu ibana sandiri, ai manjua do nasida mangulahon uhum hasintongan.

⁸Marlegotlegot do dalan ni baoa parjahat, alai tigor do anggo ulaon ni halak na pita marroha.

⁹Tagonan do maringan di bubung parsuhi ni jabu, asa marsajabu dohot parompuan parbadabada. [343†]

¹⁰Roha ni halak parjahat mangapian di hajahaton, ndang tagamon marasi ni roha ibana, nang mida alealena.

¹¹Molo tarjepol pangarehe, dapotan bisuk ma na oto, jala molo niajaran halak na pistar, ganda ma parbinotoanna. [344†]

¹²Manatap manonggor do Partigor i dompak bagas ni halak parjahat, laos didabuhon halak parjahat i tu hamagoan.

¹³Manang ise na manongsong pinggolna maradophon angguk ni na parir, joujou nang ibana sogot, hape ndang adong na mangalusi.

¹⁴Silehonlehon di sihabunian paombun rimas, jala silua di ampuan paombun piripiri bolon. [345†]

¹⁵Marlas ni roha do halak partigor mangulahon uhum; alai hasonggoton sambing do i, anggo di halak siulahon jea.

¹⁶Jolma na lilu sian dalan hapistaran, ingkon mangangguhi ibana di bagasan parbeguan. [346†]

¹⁷Ingkon hurangan do baoa na girgir marpanggalangon, ndang tagamon mamora manang ise na holong roha di anggur dohot di pangirpangir. [347†]

¹⁸Bahen partobus ni partigor do halak parjahat i, jala singkat ni halak parroha sisangunjur do halak pangoseose. [348†]

¹⁹Dengganan maringan iba di halongonan, asa marsajabu dohot parompuan parbadabada dohot na murhing. [349†]

²⁰Arta na arga dohot miak na hushus do di jabu ni halak na pistar, alai anggo jolma na oto mansuasaehonsa do.

²¹Manang ise na mangaradoti hatigoran dohot habasaon, dapotan hangoluan, hatigoran dohot hamuliaon ibana.

²²Dipanaek halak na pistar do huta ni halak na begu, jala diparumpak do tanobato pangatauanna i. [350†]

²³Manang ise na mangaramoti pamanganna dohot dilana, i ma na mangaramoti tondina maradophon hagogotan. [351†]

²⁴Halak na ginjang marroha manelengneleng, pangelak do goarna; marpangalahohon hajungkatonna na tarlobi do ibana.

²⁵Hisaphisap ni sigurbak ulu mambunu ibana sandiri, ai manjua do tanganna mulaulaon. [352†]

²⁶Ariari do adong hinapian ni rohana; alai anggo halak partigor buas do mangalehon, jala ndang mangkoliti. [353†]

²⁷Hagigian hian do pelean ni halak parjahat, muba do sogirna molo marsangkap tu hajahaton umbahen dipelehon. [354†]

²⁸Sai na mago do * sitindangi pargapgap, alai anggo baoa pananginangi masuk do ibana mandok suara ro di salelenglelengna. [355†]

²⁹Baoa parjahat papuragahon bohina, alai anggo halak partigor pahothon dalanna.

³⁰Ndada hasea hapistaran, manang roha hapantason manang tuptupan anggo maralohon Jahowa. [356†]

³¹Pinadiri pe hoda tu ari tongtangan, alai guru di Jahowa do anggo haantuon. [357†]