Read Batak Toba PODA SIAN RAJA SALOMO 22 Bible Online

PODA SIAN RAJA SALOMO 22 - Batak Toba bible

PODA SIAN RAJA SALOMO 22

¹I. [1] Argaan do barita na denggan sian hamoraon godang, andul do dumenggan roha haholongon sian perak dohot sere. [358†]

²Sai pajumpang do halak na mora dohot na pogos, Jahowa do manongos nasida sudena. [359†]

³Diida halak na bisuk do jea i ro, gabe laho martabuni, alai anggo halak na oto marsalasala pitpit gabe marsingkor. [360†]

⁴Upa ni roha haserepon dohot biar mida Jahowa: I do hamoraon, hamuliaon dohot hangoluan.

⁵Basir dohot jorgong do di dalan ni halak pargeduk, manang ise na naeng marhamaolhon hosana, dipaholang ma dirina sian i.

⁶Tibu hian pasomalsomal dakdanak i marparange hombar tu dalanna; nang dung matua ibana, ndang tagamon morot ibana sian i. [361†]

⁷Halak na mora mangarajai halak na pogos, jala ingkon mangadop parutang tu baoa parutangan.

⁸Manang ise na manaburhon hageduhon, gotilonna do sogot hamagoan, jala siap do tungkot ni hajungkatonna i. [362†]

⁹Halak na lambok marpanaili, dapotan pasupasu, ai dilehon do sian indahanna tu halak na pogos. [363†]

¹⁰Sai pabali ma halak pargeduk, asa mandao parbadaan, jadi mansadi ma parsalisian dohot tongkartongkar. [364†]

¹¹Manang ise na mangkaholongi roha hapitaon, basar huhut pangkulingna, alealena marajai. [365†]

¹²Mata ni Jahowa mangaramoti parbinotoan, alai anggo hatahata ni pangoseose, dibalikkon Ibana do.

¹³Hata ni sigurbak ulu: Babiat do di balian, atek beha bunuonna ahu maon di dalan na bolon. [366†]

¹⁴Godung na bagas do pamangan ni sibabijalang, halak na tinoruan ni Jahowa madabu tu bagasan. [367†]

¹⁵Haotoon do lohot di bagasan roha ni dakdanak, ingkon hotang pangajaran paholangkon sian ibana. [368†]

¹⁶Manang ise na mangarupa halak na pogos, paganda na di ibana do, jala manang ise na mardenggan basa tu na mora, mambahen ibana sandiri hurangan. II.

¹⁷Paeleng ma pinggolmu jala tangihon ma pangkataion ni halak na pistar, jala parateatehon ma pangajaranku.

¹⁸Ai tung hasonangan situtu do i, molo dipajop ho angka i di bagasan roham; sai rade ma luhutna i di atas bibirmu.

¹⁹Sai marhaposan tu Jahowa ma ho, i ma na hupabotohon tu ho sadarion, tu ho ma tongon!

²⁰Nda nunga husurathon tu ho hata angka na arga sahali mardongan panuturion dohot parbinotoan?

²¹Laho pabotohon tu ho hagostongon ni angka hata hasintongan, asa tung taralushon ho angka hata hasintongan tu halak na marsuru ho. [369†] III.

²²Unang tung pupusi halak na parir, ala parir ibana, jala unang tung pajepol halak na dangol hian di paruhuman. [370†]

²³Ai Jahowa do marluluhon parkaronasida, jala Ibana mamutusi hosa ni angka na mamutusi nasida. [371†]

²⁴Unang maraleale ho tu halak parmuruk, jala unang parrosurosu baoa parpiripiri. [372†]

²⁵Asa unang diguruhon ho angka pangalahona, jala manaon jorgong di hosam.

²⁶Unang pasaorsaor ho tu halak angka na marjanji, pola masijalangan, angka na manaoni utang ni halak sileban. [373†]

²⁷Molo so adong pineopmi bahen garar, boasa tagonan toltolon ni halak lage podomanmi?

²⁸Unang tung paorot talutuk sian na robi, angka na binahen ni ompum dope. [374†]

²⁹Molo diida ho baoa na manjugulhon ulaonna, tarbahensa ma tindang marhalado di jolo ni angka raja, ndengkon ibana tindang di jolo ni halak angka na lea. [375†]