Read Batak Toba PODA SIAN RAJA SALOMO 23 Bible Online

PODA SIAN RAJA SALOMO 23 - Batak Toba bible

PODA SIAN RAJA SALOMO 23

¹Molo hundul ho sapanganan rap dohot sada halak raja, ingkon tangkas timbangonmu manang ise na di jolom.

²Ingkon ampehononmu hian ma mata ni piso tu aruarum, molo tung parhisap ho.

³Unang mangapian roham di sipanganonna angka na tabo i, ai sipanganon sipaotooto do i.

⁴Unang parenge ulaonmu mangido naeng mamora, tung pasadi ma pingkiranmu sisongon i. [376†]

⁵Tung patut ma mangaranapi matam tusi, hape so adong be disi? Ai tung bahenonna do angka habongna, songon pidong raja wali na habang dompak aoangaoang.

⁶Unang pangan roti ni halak na murhing marpanaili, jala unang mangapian roham di sipanganonna angka na tabo i!

⁷Ai songon piningkiranna di bagasan rohana, songon i do ibana tongon; mangan minum ma ho, ianggo hatana tu ho, alai dao do ianggo rohana sian ho.

⁸Indahan naung pinanganmi, ingkon utahononmu muse, gabe magopo sambing hatahatam, angka na manisi.

⁹Unang ho mandok hata tu pinggol ni na oto, ai sai na reheonna do sipaingot ni hatami. [377†]

¹⁰Unang paorot talutuk sian na robi, jala unang soluk bogas ni tangan ni angka na sopot so marama. [378†]

¹¹Ai na gogo sahali do Parlulu di nasida, Ibana sandiri mangkasuhuthon parkaronasida dompak ho. [379†]

¹²Sai tarehon ma roham tu pangajaran, jala pinggolmu tumangihon angka hata parbinotoan.

¹³Unang ontohi pangajaran sian dakdanak; molo hona hotang ibana dibahen ho, ndang tagamon mate ibana. [380†]

¹⁴Hona hotang pe dagingna dibahen ho, alai anggo tondina paluaonmu ma sian parbeguan. [381†]

¹⁵Ale anaha, molo marbisuk roham, las ma rohangku, las ma tutu.

¹⁶Marolopolop huhut angka puangku, molo di hatahon bibirmu hasintongan.

¹⁷Unang mangiburu roham mida halak pardosa, mangapian ma tagonan di biar mida Jahowa ariari. [382†]

¹⁸Ai ia dung jumpang ari parpudi, ndang tagamon pesan arop ni roham. [383†]

¹⁹Mananginangi ma ho ale anaha, asa marbisuk ho, jala patongon roham tu dalan na tigor.

²⁰Unang pasaorsaor ho tu halak sisobur tuak anggur, manang tu halak sisohali lompan. [384†]

²¹Ai sai lam tu pogosna do * halak sisobur tuak anggur dohot sisohali lompan, jala marulos rumbangrambing do + halak parondohondok. [385†]

²²Sai tangihon ma hata ni amangmu na tumubuhon ho, jala unang toishon inangmu, ia dung matua ibana. [386†]

²³Tuhori ma hasintongan, jala unang gadishon nang hapistaran, pangajaran dohot roha hapantason. [387†]

²⁴Mariaia do ama ni halak partigor, manang ise na maranak na pistar marlas ni roha ma mida ibana. [388†]

²⁵Sai marlas ni roha ma amangmu dohot inangmu, ingkon marolopolop ma pangintubu di ho.

²⁶Sai lehon ma, ale anaha, rohami tu Ahu, sai dihalomohon matam ma angka dalanku.

²⁷Ai godung na bagas do sibabijalang, jala sumur na pitut do paiturun. [389†]

²⁸Tongon do, mangonggop do nasida songon halak panamun, jala dipatorop do halak pangose di tongatonga ni jolma. [390†]

²⁹Di ise ulaning hoihoi? Di ise parisuangon? Di ise badabada? Di ise holsoholso? Di ise do angka bugang so marala? Di ise do mata angka na balisaon?

³⁰Di halak angka na laon painuminum tuak anggur, di halak na ro manguji tuak na marraru. [391†]

³¹Unang paberengbereng tuak anggur i, ala marrara idaon, ala marlinolino di bagasan panginuman, ala lambok laho mabaor.

³²Hape anggo di ujungna mangkarat do songon ulok, jala dibursikkon bisana songon ulok dari.

³³Ia matamu mamereng dompak parompuan sileban, jala rohami mangkatahon getegete.

³⁴Jadi tudoshon halak na modom di tongatonga ni laut do ho, jala songon halak na modom di ujung ni tiang layar.

³⁵(Lam dohononmu dope): Hona lombut ahu, ndang hansit huhilala; ditunjang ahu ndang huboto; ia dung * tarjolma ahu, suang songon i ulahanku dioronku anggur i. [392†]