Read Batak Toba PODA SIAN RAJA SALOMO 28 Bible Online

PODA SIAN RAJA SALOMO 28 - Batak Toba bible

PODA SIAN RAJA SALOMO 28

¹* Maporus do halak parjahat soada mangalele, alai anggo halak partigor marnalom ni roha do songon singa. [449†]

²Molo masa gunturguntur di na saluat, gabe torop ma indukna; alai molo pantas jala bistok marroha angka jolma i, leleng ma induk i mangolu.

³Baoa pangulu na mangarupa angka na parir tudos do tu udan tangkuju mambaorhon hangoluan.

⁴Halak angka na tumadingkon uhum papujipuji halak parjahat; alai anggo halak na mangaradoti uhum mangalo nasida. [450†]

⁵Halak parjahat ndang mananda uhum hasintongan alai anggo halak na mangalului Jahowa mangarisik saluhutna i.

⁶Tagonan do halak na pogos na marpangalahohon hadaulatonna, sian halak na geduk na mardua roha, nang pe mora ibana. [451†]

⁷Manang ise na mangaradoti patik ni Debata i ma anak na pantas marroha, alai manang ise na maralealehon halak pargadombus mambahen haurahon ni amana. [452†]

⁸Manang ise na paganda sinamotna marhitehite bunga ni hepeng dohot parlabaan na so turut, i ma na papunguhon di halak na marasi ni roha tu na parir. [453†]

⁹Manang ise na padao pinggolna unang tangitangionna uhum, tangiangna pe antong gabe biasbias do. [454†]

¹⁰Manang ise na mangaliluhon halak na tigor tu dalan hajahaton, madabu tu bagasan godung binahenna sandiri do ibana, alai anggo halak na daulat roha manean hatuaon sogot. [455†]

¹¹Bisuk do halak na mora di rohana, alai anggo halak ma pogos na pantas marroha dapot do sulingkitonna rohana.

¹²Molo marolopolop halak partigor, godang ma hamuliaon, alai molo naek sorga halak parjahat monjap ma angka jolma i. [456†]

¹³Manang ise na mamorso angka hajahatonna, ndang tagamon mardohar, alai manang ise na manopoti, laos ditadingkon antong, dapotan asi ni roha do. [457†]

¹⁴Martua ma jolma na tongtong marhabiaran, alai manang ise na manangkangi rohana madabu tu bagasan jea do. [458†]

¹⁵Songon singa na marauang, jala songon gompul na maotaot do pangarajai parjahat gumomgom bangso na parir.

¹⁶Sada raja na hurang pingkiran, i do pagodang pangarupaon; alai anggo halak na mangkagigihon pangomoan na so turut i do na paganjang ariarina.

¹⁷Jolma panginonaan sapata ni mudar ni jolma, mompasompas do sahat ro di tanoman, unang ma antong niambat ibana. [459†]

¹⁸Manang ise na daulat marpangalaho dapotan tua, alai manang ise na geduk marpangalaho, mardua dalan, sai na tinggang do ibana di na sada. [460†]

¹⁹Manang ise na mangula tanona, bosuran do ibana di sipanganon; alai manang ise na mangolooloi marlanggelangge, bosuran do ibana di hapogoson. [461†]

²⁰Baoa haposan do sigodang pasupasu, alai anggo halak na hapogan pamora ibana, ndang tagamon lias sian uhum. [462†]

²¹Ndang denggan ruhut marmiak ni bohi, hape gari ala ni indahan sampohul, olo do baoa manjahati. [463†]

²²Monsong do roha ni baoa naeng pamora ibana, marmata pangiburuon, hape ndang diboto songgop hapogoson tu ibana sogot. [464†]

²³Manang ise na umpinsang jolma marhasangapon do ibana di ujung, gumodang sian halak na palemeslemes pangkulingna.

²⁴Manang ise na mamupusi amana dohot inana, lam didok muse dope: Ndang pola sala! Dos do ibana dohot halak panamun. [465†]

²⁵Halak pangahuti pagalak bada; alai manang ise na marhaposan tu Jahowa marlobilobi do di parbohalon. [466†]

²⁶Tung na oto sahali do manang ise na * marhaposan tu rohana sandiri, alai manang ise na marpangalahohon hapistaran, malua do ibana sian hamagoan. [467†]

²⁷Manang ise na mardenggan basa tu na pogos, ndang tagamon hurangan, alai manang ise na papitpit matana, godang bura manginona tu ibana. [468†]

²⁸Molo naek sorga halak parjahat i, monjap ma jolma na metmet, alai molo ripur halak parjahat i lam tamba ma halak partigor. [469†]