Read Batak Toba PODA SIAN RAJA SALOMO 3 Bible Online

PODA SIAN RAJA SALOMO 3 - Batak Toba bible

PODA SIAN RAJA SALOMO 3

¹I. [1] Ale anaha, sai unang halupahon poda na sian ahu, sai diradoti roham ma angka tonangku.

²Ai tambaan ni do di ho ganjang ni ariari dohot taon ni ngolum dohot dame. [26†]

³Sai unang ma tallushon sian roham habasaon dohot hasintongan, * horunghorungkon tagonan angka i tu rungkungmu, jala surathon angka i bahen parningotan ni roham. [27†]

⁴Jadi dapotan asi ni roha dohot pangantusion na denggan ho maradophon Debata dohot jolma. [28†]

⁵Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri. [29†]

⁶Sai Ibana ma tanda di nasa dalanmu, asa Ibana patigor angka dalanmu.

⁷Unang tung * na bisuk ho diparbaga roham, habiari ma Jahowa, jala paholang dirim sian hajahaton. [30†]

⁸I ma gabe hahisaron di dagingmu, jala haneangon di holiholim. [31†]

⁹Pasangap ma Jahowa marhite sian hamoraonmu dohot marhite sian patumonaan ni sandok pangomoanmu. [32†]

¹⁰Jadi marsipinjot ma angka sopom, jala sirnip tuak anggur angka pangilanganmu.

¹¹Ale anaha, sai unang toishon pangajaran ni Jahowa, jala unang hagitikhon pinsangpinsangna. [33†]

¹²Ai matua dipinsang Jahowa do na hinaholonganna, songon amaama mida anakna hasudungan ni rohana. [34†] II.

¹³Martua ma jolma na jumpangan hapistaran dohot jolma pangalapan roha. [35†]

¹⁴Ai dumenggan do pangomoanna sian pangomoan di perak, jala dumenggan parbuena sian sere palangki. [36†]

¹⁵Ummarga do i sian angka mutiha, jala sandok arta hasoloan ni roham, ndang tarpatudos tusi. [37†]

¹⁶Di tanganna siamun do ganjang ni umur, jala di hambirangna do hamoraon dohot hamuliaon. [38†]

¹⁷Dalanna do angka dalan hasudungan ni roha, jala sude lapangna hademakon.

¹⁸Hau hangoluan do Ibana di angka na mandahopi, jala manang ise na marsitiopan tusi martua do. [39†]

¹⁹Marhitehite hapistaran do dipaojak Jahowa tano on, jala marhitehite hapantason angka langit i dipadiri. [40†]

²⁰Marhitehite parbinotoanna mabola angka lung i, jala manetekkon nambur angka ombun parginjang i. [41†]

²¹Ale anaha, unang tung loas malua sian matam, sai tiopi ma tagonan roha hahohomon dohot hapantason.

²²Asa gabe hangoluan do i di tondim, jala * hajagaron di rungkungmu. [42†]

²³Jadi marsihohot ma roham manulus dalanmu, jala ndang tartuktuk ia patmu. [43†]

²⁴Molo modom ho ndang tagamon tarsonggot, jala ia naung renge ho modom, sonang ma parpodommu. [44†]

²⁵Ndang pola tahuton ho mida hagunturon so pangkiriman, manang mida rampokrampok ni halak parjahat, molo ro.

²⁶Ai Jahowa do gabe * haposanmu, jala Ibana mangaramoti patmu maradophon jorgong. [45†] III.

²⁷Unang jua mambahen na denggan tu na hurangan, molo tung tuk gogo ni tanganmu patupahon. [46†]

²⁸Unang dok tu donganmu: Datdati tusi marlaho ro; marsogot pe hulehon, hape naung dipeop ho nian nuaeng. [47†]

²⁹Unang patubutubu gasa dompak donganmu, hape nalom do anggo rohana maringan di lambungmu.

³⁰Unang pagulut ho dohot manang ise soada paralaan, molo so adong na jat dibahen tu ho.

³¹Unang mangiburu ho di baoa pangarupa, jala unang paihut dalanna nanggo sada.

³²Ai marbiasbias do Jahowa mida halak na geduk, alai * rosu do Ibana tu halak partigor. [48†]

³³Manginona do torutoru ni Jahowa tu jabu ni parjahat, alai dipasupasu do ianggo undungundung ni halak partigor.

³⁴Ibana marengkelengkelihon halak pangelesi, alai dilehon do asi ni roha anggo tu halak na unduk marroha. [49†]

³⁵Hamuliaon do teanon ni halak na bisuk sogot, alai luahonon ni haurahon do halak na oto i.