Read Batak Toba PODA SIAN RAJA SALOMO 5 Bible Online

PODA SIAN RAJA SALOMO 5 - Batak Toba bible

PODA SIAN RAJA SALOMO 5

¹I. [1] Ale anaha, sai parateatehon ma habisuhon na huajarhon i, tarehon ma pinggolmu tumangihon poda na sian ahu.

²Asa diradoti ho angka panuturion, jala dipajop bibirmu parbinotoan.

³Ai maneteknetekkon situak ni loba do bibir ni sibabijalang, jala lumandit do aruaruna sian miak. [65†]

⁴Alai anggo ujungna paet do songon pogu, tajom songon podang sidua baba.

⁵Tuat tu hamatean do ianggo patna, na roko do manjail langkalangkana. [66†]

⁶Ndang ditimbang rohana ianggo * lapang hangoluan, sai maor do pangalangkana, ndang diboto manang dompak dia. [67†]

⁷Dibahen i ale angka anaha, tangihon hamu ma ahu, jala unang manimbil hamu sian pangkataion ni pamanganku.

⁸Sai paholang ma dalanmu sian parompuan i, jala unang jumonok ho tu pintu ni jabuna!

⁹Asa unang dipasayang ho hamuliaonmu tu jolma sileban, manang angka taon ni ngolum tu halak na garang.

¹⁰Asa unang halak na asing marsaulihon gogom, jala na hinangaluthonmi tading di bagasan jabu ni halak sileban.

¹¹Jala ingkon morongorong ho di hajujumpang ni ajalmu, ia dung sun siap dagingmu dohot sibukmu.

¹²Gabe dohononmu ma: Apala huhagigihon ma pangajaran marisuang, jala ditoishon rohangku pinsangpinsang!

¹³Tung so hutangihon suara ni angka gurungku, tung so hupaeleng pinggolhu tu angka na mangajari ahu!

¹⁴Otiknari, tung marjea situtu do ahu hape di tongatonga ni luhutan dohot huria! II.

¹⁵Minum aek ma ho sian sumurmu sandiri, jala aek mata na mabaor sian tongatonga ni mualmu.

¹⁶Tung tama ma binsat angka mualmu tu balian, hira sunge di angka alaman.

¹⁷Sasada ho ma nampuna nasida, jala unang halak sileban donganmu nampunasa.

¹⁸Sai pinasupasu ma mualmu, jala dihalashon roham ma jolma ni haposoonmu!

¹⁹I ma ursa tini hasoloan di ho, jala hije hasudungan; * sombu ma roham tongtong mida bagotna, mariaia ma ho tongtong binahen ni holong ni rohana. [68†]

²⁰Boasa ma tung parhamudaonmu dirim ale anaha, mangihutihut parompuan sileban, jala pajamajamaonmu bagot ni sibabijalang.

²¹Ai patar do di adopan ni Jahowa dalan ni ganup jolma, jala dipahornop Ibana do saluhut dalan ni patna. [69†]

²²Hajahatonna sandiri do padapot parjahat i, jala angka jorat ni dosana sandiri marningot ibana.

²³Laos mate ibana ala so ditangihon pangajaran, jala binahen ni hinagodang ni haotoonna lonong ibana.