Read Batak Toba PODA SIAN RAJA SALOMO 6 Bible Online

PODA SIAN RAJA SALOMO 6 - Batak Toba bible

PODA SIAN RAJA SALOMO 6

¹I. [1] Ale anaha, molo tung mangkangkung ho di donganmu, pola masijamaan tangan ho mangkangkung halak sileban. [70†]

²Tung sura naung tarjorgong ho binahen ni hatahata ni pamanganmu, jala naung tardapot ho binahen ni pangkataion ni pamanganmu.

³Songon on ma bahen ale anaha, sai palua ma dirim ale naung tarjobung ho tu bagasan tangan ni donganmu; laho ma ho padoras langkam jala parajarajai donganmi!

⁴Unang loas tarnono matam, manang mondokondok langkop ni matam.

⁵Sai palua ma dirim songon hije sian tangan ni parburu, jala songon pidong sian tangan ni parsambil. II.

⁶Laho ma ho, ale sigurbak ulu marsiajar tu porhis, parateatehon ma angka dalanna, asa marbisuk ho! [71†]

⁷Nang so adong di ibana induk manang partogi manang pangarajai.

⁸Sai dipadiri do bohalna di partaonan logo ni ari, dipapungupungu do sipanganonna di hamamasa ni gotilon.

⁹Sadia leleng on modommodom ho, ale sigurbak ulu? Sadihari pe ho hehe sian podomanmon?

¹⁰Otiknari modom, otiknari mondokondok, otiknari mangunsimpu tangan, laos peak modom, nimmu. [72†]

¹¹Jadi ro ma hapogosonmu songon halak panamun, jala haraparonmu songon halak parlombulombu. III.

¹²Jolma parroha na jat sahali do baoa pangansi, na marpangalahohon ansiansi ni pamangan. [73†]

¹³* Mangkidophidopi ia matana mangkatai do ibana marhitehite patna, martudutudu marhitehite jarijarina. [74†]

¹⁴Getegete do di bagasan rohana, sai tongtong do ibana patahitahi hajahaton, patubitubi parbadaan.

¹⁵Dibahen i ro hinamago tu ibana so pangkirimanna, tompu do ibana ripur, so hadaonan.

¹⁶Harohaon na onom on do dihagigihon Jahowa, jala marbiasbias rohana mida na papituhon:

¹⁷Mata haginjangon; dila pargapgap; tangan angka na mandurushon mudar na so marpipot. [75†]

¹⁸Roha na patubutubu gasa; pat angka na bontis marlojong tu hajahaton. [76†]

¹⁹Sitindangi pangansi na mangaturhon gapgap, jala na pabolabola halak na marhahamaranggi. C. IV.

²⁰Ale anaha, sai radoti ma tona ni amangmu, jala unang tulakkon poda ni inangmu. [77†]

²¹Duduk ma angka i tongtong tu bagasan roham, jala horunghorungkon tu rungkungmu. [78†]

²²Molo mardalani ho, ingkon i ma mangiringiring ho; molo modom ho, ingkon i ma mangaramoti ho; jala ia dungo ho muse, ingkon * i ma donganmu mangkatai. [79†]

²³Ai * sulusulu do tona i, jala patik i do panondang, jala dalan tu hangoluan do angka pinsangpinsang ni pangajaron. [80†]

²⁴Laho mangaramoti ho maradophon parompuan parjahat dohot maradophon dila elaela ni sibabijalang. [81†]

²⁵Unang ma mangapian roham di hinaulina, jala unang tarjorgong ho binahen ni pangkirdop ni salibonna. [82†]

²⁶Ai binahen ni parompuan sibabijalang sahat iba tu roti sanseat sambing, jala jolma ni halak sileban mangago tondi na arga i.

²⁷Tung tarpatuba halak ma api di gedekgedekna, so soksohanna angka ulosna?

²⁸Tung tarbahen halak ma mardalan di atas gara ni api, so matutung patna?

²⁹Laos songon i do manang ise na manopot jolma ni donganna: Ndang tarbahen so manginsombut tu ganup na jerjer jamajama. [83†]

³⁰Gari halak panangko ingkon hona uhum do, molo manangko ibana pasabam hisapna, ala male ibana.

³¹Tung sura dapot tartangkup ibana, ingkon uhum simamitui gararonna, pola ingkon sandok ugasan ni jabuna lehononna alina. [84†]

³²Alai tung na lalaen do manang ise na mangalangkup jolma ni halak, na mangago tondina do halak na mangulahoni. [85†]

³³Jea dohot haurahon manginona tu ibana, jala ndang hasalesean haurahonna.

³⁴Ai pangiburuon manunggul rimas ni baoa, jala ndang maralangalang rohana di ari partubolon i.

³⁵Ndang parduli ibana di uhum pardengganan, jala ndang sombu rohana nang dipagodang ho dangdang.