Read Batak Toba PODA SIAN RAJA SALOMO 8 Bible Online

PODA SIAN RAJA SALOMO 8 - Batak Toba bible

PODA SIAN RAJA SALOMO 8

¹I. [1] Nda joujou do hapistaran i, jala dipangiar habisukon i suarana? [93†]

²Di punsu ni angka dolokdolok di lambung dalan, di tongatonga ni angka dalan sirpang na maropat do ibana jongjong.

³Di lambung ni angka bahal, di partungkoan ni huta i, di haroroan tu angka pintu harbangan Ibana joujou songon on:

⁴Tu hamu ale angka baoa Ahu joujou, jala tu hamu ale jolma manisia hupangiar suarangki.

⁵Marsiajar habisuhon ma hamu, ale angka na bodo, jala olo ma hamu parrohaon, hamu ale angka na oto.

⁶Sai tangihon hamu ma, ai na andar do angka na huhatahon, jala buhabuha ni bibir ni pamanganku do hasintongan.

⁷Ai habonaron do dipaboaboa pamanganku, jala marbiasbias do bibir ni pamanganku mida hajahaton.

⁸Hatigoran do saluhut hata ni pamanganku, ndang adong na geduk di bagasanna, manang getegete nanggo sada.

⁹Luhutna i unur do di halak na marroha, jala sintong di halak naung dapotan parbinotoan.

¹⁰Sai jangkon hamu ma pangajaranku, unang tagonan perak; jangkon hamu parbinotoan lobi sian sere palangki. [94†]

¹¹Ai ummarga do hapistaran sian mutiha, jala saluhut mata intan ndang tarpatudos tusi. [95†] II.

¹²Ahu, Hapistaran i maringan tampak dohot habisuhon, jala jumpang Ahu do parbinotoan ni panuturion.

¹³Biar mida Jahowa do mangkagigihon na jat, roha haginjangon dohot hajungkaton; pangalaho na jahat pe dohot pamangan getegete pe na huhagigihon do. [96†]

¹⁴Ahu do nampuna panuturion dohot hatongtongon, Ahu do nampuna pangantusion dohot hagogoon.

¹⁵Marhitehite Ahu mangarajai angka raja, jala mangkajongjongkon hasintongan angka induk. [97†]

¹⁶Marhitehite Ahu mangarajai angka induk, nang angka na sangap ro di saluhut panguhum na di tano on tahe.

¹⁷Ahu mangkaholongi angka na mangkaholongi Ahu, jala angka na burju mangalului Ahu sai jumpangsa do Ahu. [98†]

¹⁸Guru di Ahu do hamoraon dohot hamuliaon, arta angka na arga dohot hatigoran. [99†]

¹⁹Dumenggan do parbuengku sian sere palangki dohot sian sere naung niuji, jala dumenggan do na huomo sian perak na pinillit. [100†]

²⁰Ahu mangiringiring halak di dalan hatigoran di tongatonga ni angka lapang habonaron.

²¹Marbasabasahon siteanon tu angka na mangkaholongi Ahu, jala parartaon nasida hugoki do. III.

²²Jahowa do nampuna Ahu di mula ni dalanna sahali, jumolo sian jadijadianna di na robi. [101†]

²³Sian mulamula sahali Ahu dimiahi, jumolo sian mula ni tano on.

²⁴Uju so adong dope angka laut, nunga ditubuhon hian Ahu, uju so adong dope mual angka na marisi aek. [102†]

²⁵Tagan so ojak dope angka dolok, jumolo sian angka dolok batu Ahu ditubuhon.

²⁶Uju so dijadihon dope tano dohot angka adaran ro di sisiasia ni tano on. [103†]

²⁷Uju dipadiri Ibana angka langit i, nunga disi hian Ahu, uju pinahembangna hajanghajang i di atas ni lung. [104†]

²⁸Uju pinahotna angka ombun di ginjang, uju pinaojakna angka mual ni lung.

²⁹Uju binahenna parbalohan ni laut, asa unang disalpui angka aek bibirna, uju na pinahotna angka ojahan ni tano on. [105†]

³⁰Ahu do uju i di lambungna pande, jala marolopolop Ahu ariari marmeami tongtong di jolona. [106†]

³¹Jala Ahu marmeami di liat portibi on, jala * hasudungan ni rohangku do jolma manisia. [107†] IV.

³²On pe hamu ale angka anaha, sai tangihon hamu ma Ahu! Martua ma angka na mangaradoti angka dalanku. [108†]

³³Sai tangihon hamu ma pangajaran, asa marbisuk hamu, jala unang hamu mangalo.

³⁴Martua ma jolma na tumangihon Ahu, marjaga di lambung ni pintungku ariari mangaramoti angka tiang ni bahalhu.

³⁵Ai manang ise na jumpangan Ahu, jumpangan hangoluan do, jala maruli asi ni roha sian Jahowa. [109†]

³⁶Alai manang ise na mardosa dompak Ahu, mangago tondina sandiri do; nasa na mangkagigihon Ahu mangkaholongi hamatean.