Read Batak Toba PARJAMITA SIAN SI SALOMO 10 Bible Online

PARJAMITA SIAN SI SALOMO 10 - Batak Toba bible

PARJAMITA SIAN SI SALOMO 10

¹I. [1] Sada lanok na mate mambahen bau dohot gurgur miak na hushus ni sada pande ubat; suang songon i jotjot ummarga haotoon saotik sian hapistaran dohot hamuliaon.

²Roha ni halak na pistar di tangan siamunna do, alai anggo roha ni halak na oto di hambirangna do.

³Manang di dalan dia pe mardalani halak na oto i sai tarida do rohana na hurangi, hape balik disura rohana luhut halak na oto.

⁴Molo tung marronirimas raja mida ho, unang * pola humordit roham, ai roha haholomon manundati godang dosa. [81†]

⁵Adong dope jea sadanari huida di hasiangan on, tudos tahe tu haliluon na pinaksa ni pangarajai:

⁶Halak na oto balik panahatan ni pangkat na balga dibahen, ai halak na mora hundul di talaga dibahen. [82†]

⁷Huida huhut marsihundul di hoda ia hatoban, hape mardalan pat ia raja hira hatoban. II.

⁸Manang ise na mangkali godung, ibana sandiri madabu tu bagasan; jala manang ise na mangaloha parik batu, parguton ni ulok ma ibana. [83†]

⁹Manang ise na mangungkit batu, sai na tipaonna do ibana; manang ise na manggalagat hau, sai na marmara ibana disi.

¹⁰Molo dung matultul tangke dibahen manang ise, jala ndang digarut babana, ingkon mangasahon gogo na ma ibana manallikhon; alai na marhaseangkon hapistaran i do na dumenggan.

¹¹Molo * mamargut ulok tagan so hona tabas, ndang be marlaba hapandean ni panubuti. [84†]

¹²Lomo roha ni pinggol umbege pangkataion ni halak na pistar, alai bibir ni halak na oto mamondut ibana sandiri. [85†]

¹³Mula ni pangkataion ni pamanganna haotoon do, jala ujungna hata lalaen sambing do.

¹⁴Sai * dipadeakdeak halak na oto do hatahatana; ndang diboto jolma i manang aha na masa sogot, tung + ise ma pabotohon tu ibana manang aha na masa dung salpu ibana? [86†]

¹⁵Hangaluton ni halak na oto mangalojai ibana sandiri, ala so diboto topotonna dalan tu huta. III.

¹⁶Marjea ma ho, ale luat na marrajahon * dakdanak, jala sai margadombus papangan ni indukna. [87†]

¹⁷Alai martua ma ho, ale luat na marrajahon halak na marmulia hian, jala di tingkina hian mangan angka indukna mangalap gogo, ndada margadombus.

¹⁸Binahen ni gurbak ni ulu jomba angka parhau ni bagas, jala binahen ni hagaleon ni tangan, tiris jabu i. [88†]

¹⁹Lilian marhariburon nasida mambahen panggalangon, jala * anggur palashon roha ni jolma na mangolu, jala hepeng patupahon luhutna i. [89†]

²⁰Nang di bagasan pingkiranmu, * unang pulasi rajai, jala unang bura i halak na mora di bagasan bilut podomanmu, atik tung beha adong pidong na martongatonga langit patolhashon suara i jala onggang pabotohon pangkataionmu maon. [90†]