Read Batak Toba PARJAMITA SIAN SI SALOMO 3 Bible Online

PARJAMITA SIAN SI SALOMO 3 - Batak Toba bible

PARJAMITA SIAN SI SALOMO 3

¹I. [1] Martingki be do luhutna na tinompa. Martiti be do huhut nasa sangkapsangkap di hasiangan on. [23†]

²Martiti be do: Na tubu dohot na mate; na manuan dohot na mangurati na sinuan i;

³Na mambugangi dohot na pamalumhon; na mangalohai dohot na paulihon;

⁴Na tangis dohot na mengkel; na mangandungi dohot na manontor;

⁵Na mambolongkon batu dohot ma papunguhon batu; na masiummaan dohot na mandao sian na masiummaan;

⁶Na mangalului dohot na mangago; na mangaramoti dohot na mambolongkon;

⁷Na mangaribahi dohot na manjarumi; na mauhom boti dohot na marhata i;

⁸Na mangkaholongi dohot na mangkosom; na marmusu dohot na mardemak: II.

⁹Tung aha ma parsaulian na hot tinggal di pangula marhite sian ulaonna sandiri? [24†]

¹⁰Nunga tung tangkas huida hangaluton na tinurpukkon ni Debata tu jolma manisia, asa marngalutan marhite sian angka i.

¹¹Alai anggo Ibana denggan do saluhutna i dibahen di tingki halehetanna; ditompahon do huhut roha hangoluan salelenglelengna tu bagasan rohanasida, holan na so dapot jolma i sulingkitonna jadijadian na jinadihon ni Debata sian mulamula sahat ro di ujung. [25†]

¹²Dibahen i nunga tung hutanda, * ndang adong na dumenggan di nasida, nda na marlas ni roha dohot na mambahen na denggan saleleng di ngoluna. [26†]

¹³Angkup ni tahe manang ise jolma na mangan dohot na minumi dohot marnida na denggan marhite sian ulaonna, silehonlehon ni Debata do nang i.

¹⁴Nunga tung tangkas huboto, luhut na binahen ni Debata, i do na hot ro di salelenglelengna; ndang tarbahen jolma i manambai tusi, manang mangorui sian i, dibahen Debata pe songon i, asa mabiar jolma i mida Ibana.

¹⁵Manang aha na masa nuaeng, naung dung masa do i, jala manang aha na masa sogot pe, nunga dung masa do i di na robi; ai diulahi Debata do mangalului naung salpu i. III.

¹⁶Angkup ni nunga dung huida di hasiangan on: Hajongjongan ni uhum, hape masa disi hajahaton, dohot hajongjongan ni hatigoran, hape masa disi hageduhon.

¹⁷Jadi ninna rohangku di bagasan ma: Rap uhumon ni Debata ma halak partigor dohot parjahat, ai mandapot di Ibana do sogot saluhut sangkap ni roha ni jolma dohot sandok ulaonna. [27†]

¹⁸Angkup ni didok rohangku ma di bagasan: Ala ni pangalaho ni jolma manisia umbahen songon i masa, naeng unjunan ni Debata nasida, papatarhon tu nasida tudoshon pinahan sambing nasida marpangalaho, anggo sian rohanasida sandiri.

¹⁹Ai tung sisada parsorion do sogot jolma manisia dohot * pinahan; mate pinahan, mate dohot jolma i, sada do hosai i di saluhutna, ndang adong hasurungan ni manisia sian pinahan, ai laho salpu do luhutna. [28†]

²⁰Laos sada do hapatean ni luhutna; * marharoroan sian orbuk do luhutna, laos marhapatean tu orbuk muse luhutna. [29†]

²¹Ai tung ise ma umbotosa manang tung manaek tu ginjang do ia tondi ni manisia? Ia hosa ni pinahan tung turun do tu tano. [30†]

²²Dibahen i nunga tung tangkas huida ndang adong na dumenggan, nda marlas ni roha jolma i di angka ulaonna, ai i do jambarna. Ai tung ise ma mamboan jolma i tusi, asa idaonna manang aha na masa dung salpu ibana?