Read Batak Toba PARJAMITA SIAN SI SALOMO 5 Bible Online

PARJAMITA SIAN SI SALOMO 5 - Batak Toba bible

PARJAMITA SIAN SI SALOMO 5

¹I. [1] Unang magirgirhu pamanganmu, jala unang hapogan roham mandok hata anggo di adopan ni Debata; ai maringan di surgo do anggo Debata, di tano on do ianggo ho, dibahen i paotik hatahatam. [40†]

²Ai marharoroan sian godang ni hinamago do nipi, suang songon i pangkataion gapgap ni halak na oto sian * deak ni hatahatana. [41†]

³Molo * marbagabaga ho tu Debata, unang marbenda ho pasahathon, ai ndang lomo rohana mida halak na oto i. Manang aha pe naung binagabagahonmu, ingkon gararonmu do i. [42†]

⁴Tagonan tahe unang iba marbagabaga, sian na marbagabaga hape ndang pinatolhas.

⁵Unang loas pamanganmu mangela dagingmu mardosa, jala unang marneang ni roha ho mandok di * adopan ni suruan ni Debata: Nunga sala ahu! Boasa tagonan marronirimas Debata mida ho ala ni hatam, gabe mago maon sandok ulaon ni tanganmu. [43†]

⁶Ai molo deak nipi, deak huhut haotoon dohot hatahata, alai ianggo ho sai habiari ma Debata. II.

⁷Molo diida ho hona pangarupaon halak na pogos i, mago huhut uhum dohot hatigoran di luat i, unang pola longang roham mida pambahenan sisongon i; ai martuan muse do nang tuan na timbul, jala na tumimbul sahali pandapotan ni duansa nasida.

⁸Jala hasurungan ni na sada luat taringot tu saluhutna i: Molo marmulia rajana diida isi ni luat i.

⁹Manang ise na holong roha di perak, ndang olo marnamahap di perak, jala manang ise * na holong roha di hamoraon ndang tagamon gabe parsaulianna. Nang i hata oto do i. [44†]

¹⁰Molo ganda sinamot, ganda dohot halak na manganhon; tung aha ma parsaulian ni tuan nampunasa i disi, nda holan asal paidaidaon ni matana?

¹¹Renge do modom halak na loja mangula, nang otik, nang godang dipangan; hape balisaon do anggo mata ni halak na mora dibahen pargadombusonna.

¹²Adong dope huida sadanari jea bolon di hasiangan on: I ma hamoraon na hinomolhomol ni tuan nampunasa bahen hamagoanna sandiri!

¹³Ai mago do hamoraon sisongon i binahen ni soro ni ari; tung sura adong sada anak tinubuhonna, ndang adong tinggal nanggo apus di bagasan tanganna.

¹⁴Ia marsaemara ibana ruar sian butuha ni inana, laos suang songon harorona i muse ibana mulak, ndang adong boanonna agia aha upa ni hangalutonna, anggo tung pola golomgolomon ni tanganna. [45†]

¹⁵Jea bolon do nang on: Sandok ia songon i ro jolma i, laos songon i ibana laho; tung aha ma parsaulianna sian hasusaanna pagulutgulut alogo?

¹⁶Angkup ni luhut ariarina dipasudasuda di bagasan haholomon, godang huhut hasusaanna, sahitsahitna dohot murukmurukna. III.

¹⁷Ida ma, * pangarimpunan ni na denggan naung huida i: Lehet do i mangan minum jolma i jala dipasonang rohana mangihutihut sandok ulaonna hian, na niulana di hasiangan on, saleleng di ngoluna, na nilehon ni Debata tu ibana; ai i do jambarna. [46†]

¹⁸Angkup ni molo dilehon Debata tu manang ise jolma hamoraon dohot sinamot, diloas huhut ibana mangan dohot mambuat jambarna sian i huhut marlas ni roha di ulaonna, silehonlehon ni Debata do i.

¹⁹Ai ndang sadia dipaingotingot rohana angka ari ni ngoluna, ala naung nialusan ni Debata ibana marhite sian las ni rohana i.