Read Batak Toba PARJAMITA SIAN SI SALOMO 8 Bible Online

PARJAMITA SIAN SI SALOMO 8 - Batak Toba bible

PARJAMITA SIAN SI SALOMO 8

¹I. [1] Ise ma tung songon halak na pistar? Jala ise umboto lapatan ni hatangkon? * Hapistaran i do pasihar panaili ni jolma, surbot ni pamerengna pe muba do. [65†]

²Sipaingothu di ho; sai parateatehon ma hata ni raja, nang ala ni hata haburjuon naung binulanhonmu tu Debata. [66†]

³Unang hapogan ho ruar sian adopan ni bohina, jala unang pirhon parkaro na geduk, ai saguru lomo ni rohana do bahenonna.

⁴Ai hata ni raja doshon parenta do, jala ise ma na hum mandok tu ibana: Aha do na binahenmu.

⁵Manang ise na mangaradoti patik, ndang habiaranna hata na roa, diboto roha ni halak na pistar do tingki halehetan dohot uhum.

⁶Ai * martingki jala marbangko be do saluhut na masa, gabe dokdok disarihon jolma i parsorionna. [67†]

⁷Ai ndang diboto jolma i manang aha na masa sogot ai tung * ise ma pabotohon tu ibana manang beha parturena sogot. [68†]

⁸Ndang adong jolma nanggo sada, tung mandapot di ibana hosana, tung hatiopansa hosana i; jala ndang adong jolma tung mandapot di ibana ari hamamatena, jala ndang adong haluaon sian parungkilon na sasada i, jala ndang tarbahen hajahaton paluahon jolma parjahat i. [69†]

⁹Luhutna i nunga huida uju diranapi rohangku saluhut pambahenan, angka na masa di hasiangan on, uju sada jolma mangarajai donganna jolma mambahen ibana marhinamago.

¹⁰Angkup ni, nunga huida tipak tartanom halak parjahat; hape anggo halak na mangulahon na denggan, angka na ro sian inganan na badia, dihalupahon donganna sahuta do i. Ipe hata oto do i.

¹¹Ala so tibu manginona pambahenan angka na jahat i, dibahen i gok roha ni jolma manisia di bagasan mangulahon hajahaton. [70†]

¹²Alai tung sura pe ratus hali halak pardosa mangulahon hajahaton, pola sanga sarimatua ibana, tangkas do huboto: Martua sogot halak na mangkabiari Debata, angka na marparange di jolona. [71†]

¹³Alai ndang tagamon sonang anggo halak parjahat i, jala ndang tagamon paganjangonna ariarina; alai songon halinu do ibana, ala so marhabiaran tu Debata. II.

¹⁴Adong dope sadanari halongangan masa di atas tano on: Adong halak partigor, hira pambahenan ni halak parjahat niulana, parsorionna timbangon; jala adong halak parjahat, hira pambahenan ni halak partigor niulana, parsorionna timbangon. Nunga pola hudok halongangan do i. [72†]

¹⁵Dibahen i hupapujipuji las ni roha, ala na so adong na dumenggan di jolma i saleleng di hasiangan on, ia so na * mangan minum dohot marlas ni roha; i do na tinggal di ibana sian ulaonna saleleng ariari ni ngoluna, angka na nilehon ni Debata tu ibana di hasiangan on. [73†]

¹⁶Dung i diringkoti rohangku muse naeng mananda hapistaran dohot manangkasi hinamago na masa di atas tano on, pola tung balisaon mata ni jolma borngin dohot arian, ndang tarpodom.

¹⁷Jadi tangkas ma huida sandok jadijadian ni Debata, na so tardodo jolma i pambahenanna angka na masa di hasiangan on. Nang pe maradu ngalutan roha ni jolma i mandiori, ndang tagamon jumpangsa; tung sura pe ninna roha ni halak na pistar leak botoonna do i, ndang tagamon jumpangsa. [74†]