Read Batak Toba ENDE NI ANGKA ENDE SIAN SI SALOMO 2 Bible Online

ENDE NI ANGKA ENDE SIAN SI SALOMO 2 - Batak Toba bible

ENDE NI ANGKA ENDE SIAN SI SALOMO 2

¹I. [1] Ianggo ahu nian, bunga ladang sian Saron do ahu, bunga pansur sian angka rura.

²Songon bunga pansur di tongatonga ni angka duriduri, songon i ma tutu ho, ale hasoloan ni rohangku di tongatonga ni angka boruboru namarbaju.

³Songon hau unte manis di tongatonga ni hau tombak, songon i ma tutu ho, ale hasudungan ni rohangku, di tongatonga ni angka dolidoli. Dihalungunhon rohangku do hundulhundul di parlinggomanmu, jala tabo parbuena didai tolonanku.

⁴Nunga ditogu ibana ahu tu bilut parpeopan tuak anggur, jala holongna i gabe partonggol di ahu. [9†]

⁵Dipargogoi do ahu marhite sian parbue ni anggur, jala dipatogar rohangku marhite sian unte manis, ai * marsahit do ahu, dibahen sihol ni rohangku. [10†]

⁶Tanganna hambirang mangkaol ulungku, jala tanganna siamun mangkaol dagingku. [11†]

⁷Hupatolon ma hamu, ale boru Jerusalem tu angka hije dohot ursa tini, angka na di ladang, asa unang disunggul, jala unang dipahehe hamu hasoloan ni rohangku, nda ingkon sombu ni rohana do. [12†] II.

⁸Ndi, rupa suara ni hasudungan ni rohangku do i! Ida ma, nunga ro ibana maringkat sian angka dolok, marhajingjang di atas ni angka robean. [13†]

⁹Tudos do hasudungan ni rohangku * tu sada hije, manang tu anak ni ursa. Ida ma, jongjong do ibana di balik ni dorpi, mandulo sian jandela, marlinanglinang ibana mandulo sian tarali. [14†]

¹⁰Dung i mangkuling ma hasudungan ni rohangku, didok ma mandok ahu: Hehe ma ho, ale hasoloan ni rohangku, na mauliutus, jala ruar ma ho!

¹¹Ai ida ma, nunga salpu partaonan ngali ni ari, nunga mansohot dohot ari udan.

¹²Nunga pola mullop angka bungabunga di ladang, nunga jumpang tingki parendeon, nunga pola tarbege suara ni anduhur titi di tanonta i.

¹³Parbue ni hau ara pe nunga mamungka matoras, jala marbunga ia hau anggur, jala maruap na angur. Hehe ma ho, ale hasoloan ni rohangku, na mauliutus, jala ruar ma ho!

¹⁴Ho ale darapatingku na maringan di bagasan rigatrigat ni dolok batu angka na timbo, loas ma ahu marnida rupam, loas ma ahu umbege suaram! Ai na lambok do suaram, jala na uli rupam. [15†]

¹⁵Tangkup ma di hita angka antuasu, angka na metmet i, angka na mangago porlak anggur! Ai nunga marbunga hau anggurta i. [16†]

¹⁶Ahu nampuna hasudungan ni rohangku, jala ibana nampuna ahu, marmahan do ibana di tongatonga ni angka bunga pansur. [17†]

¹⁷Paima lamo ari, jala mago angka halinu; mulak ma ho, ale hasudungan ni rohangku, * na tudos tu hije manang tu anak ni ursa di atas ni dolok batu parsirangan. [18†]