Read Batak Toba PANURIRANG JESAYA 13 Bible Online

PANURIRANG JESAYA 13 - Batak Toba bible

PANURIRANG JESAYA 13

¹On ma pangungkapon taringot tu uhum madabu tu * Babel na niida ni si Jesaya, anak ni si Amos. [136†] I.

²Di atas dolok na sae ma patindang hamu partonggol, pangiar hamu ma soara * mandok tu nasida, hiraphon hamu ma tangan, asa dibongoti nasida bahal ni raja angka na marhuaso. [137†]

³Nunga hutonai angka na huparbadiai, nunga hujou huhut angka ulubalangku, angka na ro marolopolophon hatimbulonku pasonggophon rimashu.

⁴Tarbege do soara ni hariburon di atas ni angka dolok, songon soara ni bangso na balga; soara ni hagunturon ni angka harajaon ni parbegu na marluhut i; Jahowa Zebaot maningkir parangan tu hamusuon.

⁵Angka na ro sian luat na dao, sian ujung ni langit, Jahowa udur dohot angka parhobas ni murukna laho maniaphon sandok luat i.

⁶Mangangguhi ma hamu, * ai nunga jonok ari ni Jahowa; ro do ibana songon hasiapon sian pargogo na so hatudosan. [138†]

⁷Dibahen i mandate ma saluhut tangan, jala malala ateate ni sandok jolma.

⁸Jadi tarsonggot ma nasida, songgop ma tu nasida hagogotan dohot pambebeon, angka hitir do nasida, songon boruboru na tumiop siraraisan; sai masipanotnotan do nasida, songon gara do bohinasida i. II.

⁹Ida ma, sogir situtu do haroro ni ari ni Jahowa, jala marpiarpiar rimasna mambahen halongonan tano i, jala siaphononna sian i angka pardosa.

¹⁰Ai angka bintang di langit ro di bintang * poriama ndang be marsinondang, holom do + mata ni ari di habibinsarna, jala ndang be marsinondang ia bulan. [139†]

¹¹Jadi luluhononku ma tu isi ni portibi on hajahatonna dohot tu angka parjahat hageduhonna. Pasohotonku ma haginjangon ni angka na ginjang marroha, jala tarjepol bahenonku hajungkaton ni siulahon gogo.

¹²Ummahal bahenonku sada jolma sian sere palangki, jala ummahal sada jolma sian sere na sian * Opir. [140†]

¹³Dibahen i hutolonku ma langit i, asa munsat tano i sian ingananna marhitehite parpiar ni muruk ni Jahowa Zebaot dohot marhitehite ari panomboon ni rimasna. [141†]

¹⁴Jala songon ursa na binuru nasida, jala songon birubiru na so marparmahan. Ganup nasida mulak tu bangsona be, jala maporus be tu luatna.

¹⁵Nasa na dapotsa tullangonna; jala nasa na dapot tartangkup, tihamonna marhitehite podang.

¹⁶Jala * rosahanna posoposonasida di adopannasida, pupusanna angka bagasnasida, jala bahenonna na so uhum tu jolmanasida. [142†]

¹⁷Ida ma, paheheonku ma dompak nasida halak Madai, angka na so parduli di perak, jala na so mangapian di sere.

¹⁸Angka siornasida mangaragehon dolidoli, jala ndang maralang rohanasida di inaina na marhangoluan, ndang diolani matanasida angka dakdanak. [143†]

¹⁹Jadi doshon paniaphon ni Debata di * Sodom dohot Gumora paniaphonna di Babel, bungaran ni angka harajaon, hasangapon dohot hamuliaon ni halak Kasdim. [144†]

²⁰Ndang be hainganan jolma salelenglelengna, jala ndang be ebatanna marsundutsundut, jala ndang be marundungundung disi halak Arab, manang marsaro disi angka parmahan.

²¹Manggompang ma disi angka binatang sian halongonan, jala gok angka sipauk jabunasida, jala maringan disi angka pidong unto, jala marembas disi angka begu nurnur. [145†]

²²Jala marauang angka gompul di bagas simagodangnasida, jala ulok naga di bagasan jabu parsantiannasida. Jala * jonok nama tingkinasida, jala ndang be tarpaganjang ariarinasida. [146†]