Read Batak Toba PANURIRANG JESAYA 15 Bible Online

PANURIRANG JESAYA 15 - Batak Toba bible

PANURIRANG JESAYA 15

¹Uhum madabu tu * Moab. Tongon do borngin i do ditaban Ar-Moab, tung siap do. Tongon do borngin i do ditaban Kir-Moab, tung siap do. [162†]

²Nangkok ma tutu jolma tu joro dohot tu Dibon, huhut tumatangis tumopot sombaon i; mangangguhi do Moab di atas ni Nebo dohot Medeba; * saluhut ulunasida targorbang, jala saluhut mise digansipi. [163†]

³Marulos tangki nasida mardalan di alamanna, mangangguhi be do angka na mijur sian * tarup dohot sian bonggarbonggar, huhut tumatangis. [164†]

⁴Jala mangangguhi Hesbon dohot Eleale, tolhas ro di Jahas tarbege soaranasida. Dibahen i mangandungi angka parangan ni Moab, ai maras do rohana.

⁵* Mangangguhi do rohangku taringot tu Moab, tolhas ro di + Soar, lombu sitolutaon, angka na maporus sian nasida, ai sai tumatangis manangkohi nangkohan Luhit, ai di dalan tu Horonaim tarbortik do angguhangguk ni hasiapon. [165†]

⁶Ai nunga marsik angka batang aek sian Nimra, nunga malos duhutduhut, siap suansuanan, ndang adong be ingkau rata.

⁷Dibahen i tagirtagir ni na niomonasida dohot ugasan na pinajopna tu bariba ni batang aek, parbalohan tungkan Moab ditaruhon.

⁸Ai humaliang sandok Moab tarbege soara angguk, tolhas ro di Eglaim dohot Beerelim tarbege partangisnasida i.

⁹Ai gok mudar angka aek Dibon, ganda sian i dope uhum bahenonku tu Dimon, angka na malua sian Moab, singa i manganhon, ro di pasipasina isi ni tano i.