Read Batak Toba PANURIRANG JESAYA 21 Bible Online

PANURIRANG JESAYA 21 - Batak Toba bible

PANURIRANG JESAYA 21

¹I. [1] Uhum madabu tu halongonan martopihon laut. Songon pansedai ni habahaba di dangsina, harorona sian halongonan sian luat na sogir. [191†]

²Sada pangungkapon na dokdok dipapatar tu ahu: Mandobo pandobo i, martaban partaban i! Nangkok ma ho, ale Elam! Manosak ma ho, ale Madai! Pasohotonku ma sude hoihoi.

³Dibahen i gok haberniton do angka gontingku, mangae do ahu, songon pangae ni boruboru na naeng mangintubu; mangirput ahu umbegesa, angka hitir ahu marnidasa.

⁴Bukbak ateatengku, pola angka hitir ahu sian songgotna, borngin hariburonku gabe jeangku dibahen.

⁵Pinadiri ma sada meja, marhal ma parhali, mangan minum ma! Hehe ma hamu angka raja, hapuri hamu ma lombulombu.

⁶Ai songon on didok Tuhan i mandok ahu: Laho ma ho, dokkon ma parhal, asa dipaboa na niidana.

⁷Jadi diida ma sahoron baoa parsihundul marduadua, sahoron halode, sahoron unto, mansai tangkas situtu ma ibana mananginangi.

⁸Dung i joujou ibana songon singa: Sai * jongjong di parhalan do ahu ale Tuhan manipat ari, jala sai tindang di gansingku do ahu manipat borngin. [192†]

⁹Jadi ida ma, ro do sahoron baoa, parsihundul marduadua, na mangalusi, mandok: * Nunga tartaban, nunga tartaban Babel; jala nunga diparumpak sude angka ajiajian pinardebatanasida i. [193†]

¹⁰Oe ho na hudegedege, jala anak ni pardegeanku naung hubege sian Jahowa Zebaot, Debata ni Israel, i do na hubaritahon tu hamu. II.

¹¹Uhum madabu tu * Duma: Joujou do sian + Seir tu Ahu: Ale parjaga, nunga beha borngin i? Ale parjaga, nunga beha borngin i? [194†]

¹²Ninna parjaga i ma: Nunga torang ari, huhut dope borngin. Molo sapala manangkasi hamu, tangkasi hamu ma, dung i mulak ma hamu tuson. III.

¹³Uhum madabu tu Arab: Di bagasan tombak ni Arab ma marmalam hamu, ale angka partigatiga pansar sian halak Dedan i. [195†]

¹⁴Jumpangkon hamu aek tu na mauas, hamu isi ni luat Tema! Tomutomuhon hamu ma roti tu halak na maporus i. [196†]

¹⁵Ai maradophon angka podangnasida maporus, maradophon podang na sinintak, dohot maradophon sior na tinangging, dohot maradophon parmusuon na sobu.

¹⁶Ai songon on didok Tuhan i tu ahu: Di bagasan sataon dope, * songon angka taon ni anak gajian, pesan ma sandok hamuliaon ni + Kedar. [197†]

¹⁷Jala lam tu otikna di bilangan ni pasipasi ni angka pande manior, angka anak na begu sian Kedar, ai Jahowa, Debata ni Israel mandok songon i.