Read Batak Toba PANURIRANG JESAYA 24 Bible Online

PANURIRANG JESAYA 24 - Batak Toba bible

PANURIRANG JESAYA 24

¹I. [1] Ida ma, palangaon jala pasiapon ni Jahowa ma tano i, jala balikkononna ma sisikna, pasiaphon angka pangisina.

²Jala doshon halak natorop ma malim, doshon naposo tuanna, doshon boruboru sonduhan soranganna, doshon panuhor panggadis, doshon parsambut parsambutan, doshon pangurang pangurangan. [216†]

³Langa situtu ma tano i jala pinupusan, ai Jahowa do mandok hata on.

⁴Majal jala tarulang ma tano i, majal jala tarulang liat portibi on; maras ma dohot angka na timbul sian bangso i di tano on.

⁵Jala ramun tano i dibahen pangisina, ai nunga dilaosi nasida angka patik, jala diuba hasomalan, jala diose padan na salelenglelengna.

⁶Dibahen i siap do tano i gagaton ni torutoru jala manginona tu angka pangisina; dibahen i masoksok angka isi ni tano i, jala otik nama jolma teba.

⁷Marsik do tuak anggur, malos ia hau anggur, marhoi be sude angka na las roha na sai laon. [217†]

⁸Mansohot do las ni roha binahen ni arbab! Mansadi hariburon ni angka parolopolop; mansohot las ni roha binahen ni hasapi. [218†]

⁹Ndang be marende nasida uju minum anggur, paet do tuak na pang di roha ni halak na manginumsa.

¹⁰Nunga maloha huta na langa i, hinsu be sude angka bagas, ndang be habongotan.

¹¹Masa angguhangguk di angka alaman ala hurangan anggur; nunga pesan nasa las ni roha, nunga mapurpur nasa las ni roha ni tano on.

¹²Turanggong nama teba di huta i, jala tahaonna ma angka pargumbangan i.

¹³Ai masa ma di parsitongaan ni tano i, di tongatonga ni angka bangso, songon pangkuturon di hau jetun, songon pamutihon, ia dung salpu gotilon. [219†] II.

¹⁴Ianggo nasida, pangiaronnasida ma soaranasida, marolopolop mida hamuliaon ni Jahowa, marolopolop ma angka nasida sian laut. [220†]

¹⁵Dibahen i pasangap ma Jahowa, hamu angka isi ni tano, habinsaran, hamu angka isi ni pulo di laut goar ni Jahowa, Debata ni Israel.

¹⁶Sian ujung ni tano on hubege hami angka ende pujipujian: Hamuliaon ma di partigor! Jadi ningku ma: Ngalutna i di ahu, ngalutna i di ahu! Jea tonahon! Manjehehon angka parjehe, tongon manjehehon angka parjehe.

¹⁷Hasogiron dohot godung dohot jorgong songgop tu ho ale isi ni tano i!

¹⁸Ai tung sura maporus manang ise maradophon soara ni hasogiron, madabu do ibana tu godung; jala manang ise na manaek sian godung, dapot do ibana di jorgong. Ai nunga buha angka pandiloan di langit jala humuntal angka ojahan ni tano on. [221†]

¹⁹Marsidomdom situtu ma ianggo tano i jala angka rigat situtu, gunsang situtu ma tano i. [222†]

²⁰Lalolalo situtu ma tano i, * songon halak na mabuk, jala mambalambal songon geanggeang, ai manginona tu ibana pangalaosina, gabe tinggang, jala ndang tarbahensa be hehe. [223†]

²¹Jadi di ari na sasada i marlulu ma Jahowa dompak * parangan angka na ginjang marroha di haginjangonna dohot dompak angka raja ni tano on di atas tano on. [224†]

²²Rap paluhutonna ma nasida tarrante tu bagasan godung, jala hurungkononna nasida tu bagasan hurungan, dung i * di laonlaon ni ari marlulu muse ibana dompak nasida. [225†]

²³Jadi * maila ma bulan, jala tarurak mata ni ari, ai + Jahowa Zebaot Raja di dolok Sion dohot di Jerusalem, jala hamuliaon do di adopan ni angka sintuana. [226†]