Read Batak Toba PANURIRANG JESAYA 30 Bible Online

PANURIRANG JESAYA 30 - Batak Toba bible

PANURIRANG JESAYA 30

¹I. [1] Marjea ma * anak angka na marbalik ninna Jahowa, angka na mambahen tahi so marhite sian ahu, jala mambahen janji so marhite sian tondingku, asa pagukguk dosa tu dosa. [276†]

²Angka na laho tuat tu Misir, hape ndang jolo marpanungkun tu pamanganku, naeng marhara tu hagogoon ni Firaun, jala marhaporusan tu linggom ni Misir. [277†]

³Hape ingkon gabe haurahonmuna do hagogoon ni Firaun jala gabe haelesonmuna do haporusan tu linggom ni Misir.

⁴Ai sahat tu * Zoan angka rajanasida, jala tolhas ro di Hanes angka suruannasida. [278†]

⁵Saluhut do nasida tarurak ala ni bangso na so marguna di nasida, na so marpanumpahion manang marguna, ai gabe haurahon do i dohot haeleson. [279†]

⁶Uhum madabu tu angka pinahan ni tano pardangsina: Di tano hagogotan dohot hasosahan, haroroan ni singa boruboru dohot jantan, haroroan ni libe dohot naga na habang ditaruhon nasida di atas tanggurung ni halode artanasida, jala di atas tanggurung na bungkuk ni unto sinamotnasida tu sada bangso na so marguna.

⁷Ai alogo sambing do panumpahion ni Misir, dibahen i hugoar do i: * Rahab, hape sai so do nasida. [280†] II.

⁸Antong ro ma ho, uhirhon ma i tu sada batu di jolonasida jala surathon ma i tu bagasan sada buku, asa tongtong dipeop tu ari sogot ro di salelenglelengna. [281†]

⁹Ai bangso na tangkang do nasida, angka anak pargabus, angka anak na so olo manangihon patik ni Jahowa.

¹⁰Angka na mandok tu halak paralatan: Unang hamu maralatan! Dohot tu angka panurirang: Unang surirangkon hamu tu hami hasintongan! Lomo ni rohanami ma tagonan paboa hamu, jala angka sipaotooto surirangkon hamu.

¹¹Manginsurut ma hamu sian dalan i, manimbil ma hamu sian dalan na bolon, padao hamu ma sian jolonami ibana na badia ni Israel.

¹²Dibahen i songon on do hata ni na badia ni Israel: Ala dibolongkon hata on, jala marhaposan hamu tu pangarupaon dohot tu panimbilon jala marpangunsandean tusi.

¹³Dibahen i hajahaton on gabe doshon rigatrigat na gistang di hamu, nunga pola duruk di dorpi na timbo, ganup tongkin do ibana panagamnagamon di hatotompasna.

¹⁴Jala taporanna nasida, songon hatatapor ni hudon tano, na tinaporan so maralangalang, ndang adong jumpang sian taportaporna i tau ngarngar pangalapan gara ni api sian tataring, manang manahui aek sian sumur. III.

¹⁵Ai songon on do hata ni Tuhan Jahowa, na badia ni Israel! Marhitehite hamulakon dohot * hahohomon jumpangan hatuaon hamu; marhitehite hasabamon dohot marhitehite nalom ni roha maruli hagogoon hamu. Alai ndang olo hamu. [282†]

¹⁶Lam didok hamu do: Ndangana, tagonan hami mangkunduli hoda laho maporus, dibahen i ingkon maporus hamu tutu; tagonan hami marsihundul tu na doras mardalan, dibahen i lam marenjak ma halak na mangalele hamu. [283†]

¹⁷* Saribu halak sian hamu maporus maradophon ogaoga ni sada halak, maradophon ogaoga ni na lima halak maporus do hamu sude paima pasipasimuna, songon hau na rimpur di punsu ni dolok, jala songon tonggol di robean. [284†]

¹⁸Dibahen i sai maimaima Jahowa, naeng marpangulahi rohana tu hamu; laos alani borhat ibana asa asianna hamu, ai Jahowa do Debata ni uhum. * Martua ma sude na mangkaposi ibana. [285†]

¹⁹Ho ale bangso na maringan di Sion, di Jerusalem, na so tupa be tama tangis hamu! Asi ma rohana di ho, disi * begeonna soara ni angguhanggukmu, alusanna ma ho. [286†]

²⁰Jala nang dilehon Tuhan i tu hamu roti hagogotan dohot aek pangarupaon, alai ndang be martabuni anggo angka gurum, idaon ni matam ma tongtong angka gurami. [287†]

²¹Jala apala pinggolmu umbege hata ni na mandok sian pudim: On do dalan i, i ma dalan i! * Unang manimbil hamu tu siamun manang tu hambirang! [288†]

²²Jadi * ramunanmuna ma disi ganaganaanmu angka na nilampis dohot perak, ro di ulos angka na marhadohoan, gombaranmu na tinompa sian sere pe, sirsirhononmu ma angka i songon napu, misir ma ho, i ma dohononmu tu ibana. [289†]

²³Jadi ibana ma mangalehon udan tu bonim naung sinaburhonmu tu haumam, dohot roti gogo ni hauma i, togong ma i huhut marmiak bahenonna, manjampal ma ia pinahanmu di ari na sasada i di panjampalan na bidang. [290†]

²⁴Tole angka jonggi dohot halode, angka na maninggalai tano i, panganonna ma gagaton na togong saor sira, naung sinege marhitehite durungdurung dohot anduri.

²⁵Jadi adong ma di atas ni saluhut dolok angka na timbo dohot rahisrahis na hinsat, angka sunge angka halian aek di ari tongtangan godang, molo marumpak angka palaspalas. [291†]

²⁶Jadi * tiur ni bulan ma disi songon tiur ni mata ni ari, jala silompit pitu hali ganda tiur ni mata ni ari i, doshon hatiuron ni pitu ari tahe, di ari uju liliton ni Jahowa bugang ni bangsona, jala + pamalumonna holiholi na magas binahen ni paminsangna? [292†] IV.

²⁷Ida ma, ro ma goar ni Jahowa sian na dao, marsigorgor ia rimasna, martimpul ma timus i, ia bibir ni pamanganna gok rimas na marpiarpiar, jala dilanai doshon api na mandilatdilati do.

²⁸Jala hosana doshon aek magodang * tolhas ro di rungkung, mamiari angka bangso parbegu marhitehite anduri hasiapon, jala + kokang haliluon ampe tu osangosang ni angka bangso. [293†]

²⁹Alai anggo di hamu masa ende pujipujian songon uju di borngin parhontasan tu pesta dohot halalas ni roha songon halak na martulila laho manopot dolok ni Jahowa, tu dolok batu ni Israel. [294†]

³⁰Alai patubegehonon ni Jahowa ma soarana na marmulia i jala pataridahononna tanganna na mangondam marhitehite parpiar ni muruk dohot * jilam ni api na maniaphon marhitehite aek na sumar, udan tipotipo dohot batu ambolas. [295†]

³¹Ai tarsonggot ma Assur maradophon soara ni Jahowa, na mangalipat ibana marhitehite tungkot.

³²Jala nasa pamolusan ni tungkot paminsangon i sipasonggopon ni Jahowa tu ibana, masa do i marhitehite pamaluon hasarhasar dohot hasapi dohot marhitehite angka hamusuon na sobu aloonna ibana. [296†]

³³Ai nunga tibu hian * diparade pamurunan i di nasida dohot di rajai dipadiri, bagas jala lambas do i dibahen; godang situtu do api dohot hau di pamurunanna i, na pinagalak ni hosa ni Jahowa, doshon sunge barerang do godangna. [297†]