Read Batak Toba PANURIRANG JESAYA 4 Bible Online

PANURIRANG JESAYA 4 - Batak Toba bible

PANURIRANG JESAYA 4

¹Jadi di ari na sasada i soroon ni pitu boruboru ma sada baoa, huhut mandok: Mangan indahannami pe hami, jala hami pasarisari parulosonnami, asal marpanggoarhon goarmu hami; sai buati ma * haurahonnami! [45†]

²Di ari na sasada i sogot, uli jala marmulia ma * tunas ni Jahowa, gabe huhut uli parbue ni tano i di angka ma malua sian Israel. [46†]

³Jala targoar na badia sogot angka na teba di Sion dohot di Jerusalem, nasa na * tarsurat goarna di Jerusalem dapotan hangoluan. [47†]

⁴Ia dung * diburi Tuhan i taktak ni angka boru Sion, jala diaup angka utang mudar ni Jerusalem, sian tongatongana marhitehite + tondi ni uhum dohot marhitehite tondi ni parsegeon. [48†]

⁵Jadi tompaon ni Jahowa ma di atas ni saluhut inganan ni dolok Sion dohot di atas ni parluhutanna sada * ombun arian dohot timus ro di sondang ni api na marsigorgor borngin, ai linggomanna ma saluhut hamuliaon. [49†]

⁶Jala adong sogot * parlapelapean bahen parlinggoman arian maradophon parngiar ni ari, jala haporusan dohot panisioan maradophon ari dohot udan na por. [50†]