Read Batak Toba PANURIRANG JESAYA 40 Bible Online

PANURIRANG JESAYA 40 - Batak Toba bible

PANURIRANG JESAYA 40

¹I. [1] Apuli, apuli hamu bangsongki, ninna Debatamuna.

²* Hata apulapul ma dok hamu tu roha ni isi ni Jerusalem, jala jouhon hamu ma tu nasida: Nunga marujung parungkilonna, ai nunga salese dosana i, ai nunga dijalo sian tangan ni Jahowa + silompit dua singkat ni saluhut dosana. [366†]

³Soara ni na joujou di halongonan: Pauli hamu dalan di Jahowa; patigor hamu di adaran dalan balobung di Debatanta. [367†]

⁴Ingkon gohan do nasa rura, jala parejeton nasa dolok dohot buntulbuntul, jala gabe na hornop do na marnangkok tuat, jala gabe rura tanggurung ni dolok.

⁵Jadi patar ma hamuliaon ni Jahowa, jala sange nasa sibuk marnidasa, ai pamangan ni Jahowa do mandok. [368†]

⁶Adong sada soara na mandok: Joujou ma ho! Jadi dohononna ma: Aha do Jouhononku? * Duhutduhut do nasa sibuk, jala doshon bunga pansur hinadengganna i sudena. [369†]

⁷Nunga malos duhutduhut i, nunga marurus bunga i, ai nunga mangombus Tondi ni Jahowa tusi. Tongon tahe duhutduhut do bangso i.

⁸Nunga malos duhutduhut i, nunga marurus bunga i, alai anggo * hata ni Debatanta sai hot do ro di salelenglelengna. [370†]

⁹Tu dolok na timbo ma ho nangkok, ale Sion parbarita nauli i! Pangiar ma soaram ale Jerusalem parbarita nauli i, sai pangiar ma, unang ho mabiar! Dok ma tu angka huta ni Juda: Ida ma, disi do Debatamuna i.

¹⁰Ida ma, marhuaso do ro Tuhan Jahowa, jala tanganna gumomgom ibana; ida ma ihut tu ibana upana jala di jolona pamalosonna. [371†]

¹¹* Parmahanonna ma punguanna songon parmahan, papunguonna ma angka anak ni birubiru tu tanganna jala usungonna di ampuanna, lambok do pangaduna di angka panusuan. [372†] II.

¹²Tung ise naung manuhati angka aek manggim, jala dijongkali angka langit, jala dibalei nasa orbuk ni tano on? Jala didasing angka dolok marhitehite timbangan jala angka buntulbuntul marhitehite hatian?

¹³Tung ise ma na tuk mandodo Tondi ni Jahowa, manang panuturi na manurgasi Ibana? [373†]

¹⁴Tung tu ise ma ibana mangalap roha, asa diparrohai ibana jala diajarhon tu ibana lapang ni uhum, jala diajarhon tu ibana parbinotoan, jala dipabotohon tu ibana lapang ni hapistaran?

¹⁵Ida ma, doshon santetek aek di panguhatan do angka bangso, jala doshon orbuk na nipis di timbangan do nasida dirajum. Ida ma, doshon orbuk angka pulo i dibonggal.

¹⁶Gari hau di Libanon ndang singkop tutungonna, jala angka binatang ndang singkop bahen pelean situtungon.

¹⁷Doshon na soada sude angka bangso di jolona, moru tahe sian na soada nasida dietong ibana. [374†]

¹⁸Tung tu ise ma naeng patudosonmuna Debata? Manang sumansuman dia naeng paradeonmuna di ibana? [375†]

¹⁹Tungkang i manompa ganaganaan i, na nililitan ni panopa dohot sere jala marduri perak dibahen.

²⁰Manang ise na hurang parbohalon, dipillit ma sada hau na maol busuk, dilului ma sada tungkang na pistar di ibana laho paulihon sada ganaganaan na so tarhutik.

²¹Tung so mamoto hamu? Tung so dibege hamu ma i? Tung so pinaboaan tu hamu sian mulamula? Tung so ditimbangi hamu ma angka ojahan ni tano on?

²²Marhabangsa ibana di atas ni liat portibi on, jala doshon sihapor angka pangisina i. Ibana * pahembang angka langit songon dagangan na halus, dipahire nasida songon abit undungundung bahen inganan. [376†]

²³Ibana pasahathon angka panggomgom gabe soada, angka panguhum di tano on gabe marlea dibahen. [377†]

²⁴Ipe nasida disuan, ipe nasida disaburhon, ipe marurat pangkalnasida di tano i, asal mangombus ibana dompak nasida, nunga malos, gabe dihabangkon habahaba i nasida songon rapanrapan.

²⁵Tung tu ise ma patudosonmu ahu, paboa suman ahu tusi ninna na badia i.

²⁶Manaili ma matamuna dompak ginjang, jala ida hamu, tung ise ma na manompa angka i? Tung ise ma paruar parangannasida marbilangan? Ibana tahe * manjou luhutna i di goarna be, marguru tu hinagodang ni gogona, jala ibana do na sun hinagogo, ndang tagamon lilis nanggo sada. [378†] III.

²⁷Boasa ma dohononmu ale Jakkob, jala didok ho ale Israel: Buni do dalanku maradophon Jahowa, jala ndang maruli uhum ahu sian Debatangku.

²⁸Atehe, ndang diboto ho, manang ndang dung dibege ho? Debata salelenglelengna do Jahowa, * sitompa angka ujung ni tano on, ndang olo loja manang mandate ibana, jala ndang + hadodoan pingkiranna i. [379†]

²⁹Ibana balik mangalehon gogo tu na loja, jala dipargogoi situtu angka na so margellok.

³⁰Loja pe angka dolidoli jala mandate, jala tarsulandit angka na mardaging na tambos.

³¹Alai angka na marhaposan tu Jahowa maruli hagogoon mardapotdapot, gabe marhabong ni * lali laho manaek. Marlojongi nasida ndang olo loja, mardalani nasida ndang olo mandate. [380†]